Gam kha 11, 2026 ❖ THE TEDIM POST
Malaysia gam, Senai, Johor ah zanni Gam kha (June) 10, 2026 sun hun sungin Zomi numei khat inn dawl thumna pan leng khia in tulaitak Kulai zato ah kikem cih thu kiza hi.
A lenkhiat khit a kiim a paam ate’n a muh uh ciang vaipuak neite tungtawn in Myanmar gammi Ko Min Thant a zaksak khit uh ciangin zato kipuak suak ci hi. Tun ahih leh khua zong phawkkik ta cih kiza a, a khe lang nih a guh kitan ahih manin operation bawl dingin JB zato ah kipuak ding cih thu Ko Min Thant’ pulakna tungtawn in kithei khia hi. Tua banah, hih sanggamnu hoihtak zato ah aki bawl theih nading akisam zum vai lai bawl dingte zong a manlang in ki vaihawm sak cih zong pulak beh hi.
Ko Min Thant in a genna ah, “Hih sanggam nu pen a lawmngaih pa tawh a kingaih zawh kal khat sungin amau kikal ki kamtamna panin, zu kham in a inn phaitam lam pan a lengkhia hi,” ci-in pulak hi.
Hih a lengkhia sanggamnu min pen Lia Cing Khawl Nuam (kum 20) in kithei a, Kalaymyo pan ahi hi.
