Gam kha 12, 2026 ❖ THE TEDIM POST
Meta company te’ social media platform pawlkhat tuni Gam kha (June) 12, 2026 nitak hun pawl in themvei kingah lo a, leitung bup a om Facebook, Intagram, Messenger leh Whatsapp application a zang mipite kikal ah lemlohna hong piang hi.
Hih lemlohna pen US hun zingsang 9:30 am pawl panin hong kipan a, Outage-monitoring website Downdetector te pulakna ah Facebook azang 62,000 val leh Instagram azang 8,000 val in hih buaina tawh kisai tangkona nei uh hi ci-hi.
Meta te’ platform a zangte in amau’ account sung pan upmawh lohin kilut thei lo a, alutsa te a zong log out ziau hi ci-hi.
Hih buaina hangin gam tuamtuam pan tangkona bawl uh a, leitungbup a om social media zang mipite tung ah buaina piangsak hi ci-in gen uh hi.
Hih buaina pen leitung gam tuamtuam US, UK, India, Canada, Australia leh gamdang mun tuamtuam ah a piang ahi hi.
Tuciang dong Meta company lam pan hih buaina tawh kisai tangkona kician bawl nailo uh a, a puahphat theih nading un a hanciam laitak uh ahi hi.
