Theinosih kha 30, 2026 ❖ THE TEDIM POST
Chin State sunga a om ahi township 7 kihel in gam bup mun tuamtuam a township 63-te ah Martial Law (Galkap Ukna) pen ni 90 sung kikhanto lai ding hi ci’n SAC’ National Defense and Security Council in Theinosih kha 29 ni-in pulakna nei hi.
Chin State sungah Chin defense forces te’ ukna ahi Kanpetlet, Thantlang, Paletwa, Tonzang, Mindat, Matupi leh Falam township-te kihel Myanmar gam sung region leh sate a kigawm township 63 te kihel hi.
Hih munte pen 2025 Tangsih kha 31 ni-in galkap ukna (Martial Law) sung ah om ding ci’n pulakna nei uh a, tu-in Galkap Mangpi Min Aung Hlaing’ thupiakna tungtawn in ni 90 sung a kibehlapto ahi hi.
Galkap kumpite in a uk zawh nawnlohna munte leh a khahsuahsa munte ah galvan zang in ngongtatnate a bei theih nading leh gamsung ah daihna a om theih nadingin 2008 Thukhunpi, Dal 412 (a) siksanin hih bangin galkap ukna a kibawl ahi hi ci’n pulak hi.
Galkap ukna (Martial Law) a kipulakna munte ah galkap kumpi in galkap tha leh galvan tha zangin nasiatakin do bek thamlo vanlam tawh zing bomb khia zelzel uh hi.
Source: Chin World
