Khuado kha 3, 2026 ❖ The Tedim Post
A beisa Tangsih kha (July) 29 ni-in social media tung ah Young Century Welfare (YCW) sang neipa, U James Da Ro Thang (kum 50 val) in tuma kum 10 lai pek pan a sangnaupang numeinote tung ah a kilawmlo gamtat, kampaunate palsat hi cih Against Sexual Violence (ASV) kipawlnate pulak khiatna pen YCW sang lam pan thuman hilo hi cih a nialna uh Khuado kha (August) 2, 2026 ni-in sang page pan suaksak uh hi.
Tua laisuahna ah YCW sang neipa in sitni Daw Haling Za tungtawnin hih thu pen a manlo hi a, sang min siatsak nading lunggulhna leh sangneipa mindai nading deihna tawh hong kimawhmatna ahi hi. Tua banah, YCW sang pen 1996 pan minsiatna khat zong omlo in a ding sang khat ahi hi. Hih bangin social media tung ah thumanlo tawh a mawhsakte in a hunlap in a phiatkik kei uh leh thukhun zui-in thu ka bawl ding hi ci-in pulak khia hi.
Hih laisuahna tawh kisai ASV kipawlna makai Aung ZaBu Kyaw Hein in Khuado kha 1, 2026 ni media te tawh kimuhkhopna pan a genna ah, “Sangneipa lam pan hih thu tawh kisai bang danin hong dawngkik ding uh cih pen amau khensatna hi. ASV lam pan bel minsiatsakna cih tawh thu hong kibawl sawm pen ni dang pek pan ka na tuah ngeisa uh thute ahih manin lamdang salo banah, ka linglawng kei uh hi. Ahi zongin a thuakkha sangnaupangte’ lunggulhna zui-in thu bawlding dinmun ciang a tun zenzen leh zong a tawp dong panpih suak ding hi ung,” ci-in pulak khia hi.
ASV kipawlnate’n hih vai a pulak khiat zawh uh ni 6 sungin ASV tungah a va gen rape case a kihel YCW sangneipa’ zahmawh bawlna a thuak mimal 20 val omta a, social media tung ah zong sangnaupang lui pawlkhat in amau hun lai-in a thuaknate uh pulak khia ngeingai uh hi.
