Khuado kha 1, 2026 ❖ THE TEDIM POST
Sagaing Region, Kalaymyo, Tahan veng, Thazin lampi tunga om YCW Private High School neipa Pa James Do Ro Thang @ Aakhuai (kum 50 val) in a beisa kum tampi sungin a sangnaupang numeinote tungah zahmawh thu tawh kisai a kilawm lo-in gamtat, kampauna nei hi ci-in Against Sexual Violence (ASV) kipawlnate pulakna tungtawnin kithei khia hi.
Hih bang a thuak kha sangnaupang numeinote in ASV kipawlnate kiang a va genna tungtawn un a thuak kha (victims) teng aitangin social media tung ah ASV kipawlnate in social punishment bawlding a pulak khiat sak uh ahi hi.
ASV te-in hih thupiang tawh kisai a masa pen Khuado kha (August) 29, 2026 ni-in pulak khia uh a, tuni ciang dong ASV tung ah a pulak khia, zahmawhna a thuak mimal 20 val bang pha ta a, tua lak pan 2 te bang rape case dong a thuak uh hi ci-in pulak uh hi. Hih bangin a pulak khia sangnaupang 20 valte pen a beisa tuma kum 10 laipek 2015 pan nung kum 2026 kikal dong YCW ah sang a kah sangnaupangte vive hi uh a, Grade 8/ 9/ 10 (kum 15/16 gual) sangnaupangte hi ci-in ASV in pulak khia hi. Ahi zongin ASV in a thuak kha sangnaupangte security ding ngaihsut sak na tawh amau’ information te a kician in mipi’ mai ah pulak khia lo uh hi.
ASV tungtawnin a pulakkhia sangnaupangte in, “Siapipa pen numeite hostel lam ah om a, numeite kisilna khan ah paulap tuamtuam tawh ginkholhloh laitak lut in sit thei zel hi. Numeite lupna khan ah zong guide siamahte palo-in surprise check cih tawh lut ziauziau thei hi. Sangnaupangte a ngaplo khat peuh a om ciangin ama’ zum khan ah kipai sak hi. Lutangnate amah’n meksak a, nawi cancer ngahloh nading cih paulap tawh koici mekding cih hilh in, numeite’ awm khawng mek sak hi. Laiphi kuan ciang lungsim gim thei ahih manin a phattuam nadingin ei-le-ei i lungsim tawldam nading bangci hih ding ci-in, a bombi sung uh sawksak kawm hi bang danin masturbate kibawl hi cih khawg hilh hi. Pawlkhatte hileh a thakiam lua/gawng lua cih paulap tawh a kawng uh pan dom in, a phei tung ah tu sak a, a awm uh khoih thei zel hi. Hi bang dan a bawl theih nadingin sangnaupang zatui ngen dingte khat khat ta bekin a khan sungah lut sak hi,” ci-in pulak uh hi.
Tua bek thamlo pawlkhatte tungah, “Lawmpa na nei ta hia? Na lawmpa tawh om khawm khin maw? Na lawmpa tawh na kinam ngei hiam? Bang ci lecin na lawmpa tawh omkhop ding feeling ngah na hiam? cih bang dan dotnate khawng kong deihsak man hi cih paulap tawh dong thei zel hi. Hihte pen theihloh a phamawh sex education hi ci-in sangnaupangte brain wash bawl toto hi.” ci-in zong pulak uh hi.
Tua banah, hih bang a sepnate a nial sangnaupang pawlkhat zong om a, tua dan ciangin sangnaupangte nitaklam biakpiak kikhop hun sungah ama deihsakna leh itnate tello uh ci-in a min a sap tawh a saploh tawh sangnaupang khempeuh mai ah taii in mindai sak thei zel lai hi.
“Khat vei bang pen sangnaupang khat in a phei tung ah puii (ပွေး) nei ahih manin zatui a nget leh, “ken en masa phot ning,” ci a, tua sangnaupangnu a ut kei a leh sangnaupang khempeuh mai ah maizum sak in “ken kong deih sak man a kong tua cih hi” ci-in tawnggawp hi.” ci-in ASV te’ pulak khiatna tungtawnin kimu thei hi.
