Hello! Dam maw Zomi! Tedim Post pan hong muakkik ung. Tuni Phal kha ni 26 (Nipini) October 26, 2025 kal khat sung thuthangte genkikna hong nei ning.
A kihel ding thulute in-
➤ SAC IN ZATHAL SANGINN BOMB KHIAT
➤ SAC IN KANPETLET TOWNSHIP BOMB KHIAT
➤ CHIN STATE HLUTTAW DEM DING TANGMI 83 PHA
➤ SAC IN LETPANCHAUNG KHUA HAL
➤ 14 BILLION MMK MANH KHAMTHEIH KIMAN
……………………………………
➤ SAC IN ZATHAL SANGINN BOMB KHIAT
Hakha township, Zathal (ဇာထာလ်ရွာ) khua sanginn ah October 21 zan 12:55 am kiim in khatvei leh 1:00 am kiim in khatvei, a kigawm nihvei SAC in bomb khiat hi cih Senthang Central Council (SCC) in pulakna nei uh hi. Hih bangin mipi leh naupangte ngimna tawh bomb khiatna pen nasia takin nial ung ci-in lai zong suak sak uh hi.
SCC in SAC bawl ding kiteelpi ah kuamah kihel loh nading leh ciangtan omlo-a sanginn khak phot dingin hanthawn uh hi.
Abeisa October 13 in zong SAC in Hakha township, Vanha (ဗန်ဟား) khua ah bomb a khiatna hangin sangnaupang nih in hong nusia in mi tampi in liamna ngah hi.
……………………………………
➤ SAC IN KANPETLET TOWNSHIP BOMB KHIAT
Kanpalet township khuasung mun 2 ah SAC in October 24, 2025 zingsang nai 9:00 kiim pawlin bomb khiat ahih manin mi 3 si hi ci-in CDF- Kanpalet thugen khuan nei Salai Peter Than Shwe in gen hi.
Bomb khiatna mun pen CDF- Kanpalet makai pipa mopawi bawlna mun hi ci-in zong kigen hi.
……………………………………
➤ CHIN STATE HLUTTAW DEM DING TANGMI 83 PHA
2025 Dec 28 ni ciangin a kibawl ding kiteelna ah Chin state pan in a kihel ding tangmi’ minte UEC in Oct 19 ni-in tangko khia a, Amyota Hluttaw, Pyitu Hluttaw leh Pyinee Hluttaw dem ding U Soe Thet (NCC), U No Than Kap (NCC) leh U Pau Lun MIn Thang (ZNP) cihte kihel mimal 83 kihel hi.
Chin state pan in ခူမီးအမျိုးသားပါတီ (KNP) pan mun 1, ပြည်သူ့ရှေ့ဆောင်ပါတီ (PPP) pan mun 9, ဇိုမီးအမျိုးသားပါတီ (ZNP) pan mun 19, ချင်းပြည်သစ် ကွန်ဂရက်ပါတီ (NCC) pan mun 26 leh ပြည်ထောင်စုကြံ့ခိုင်ရေး နှင့် ဖွံ့ဖြိုးရေးပါတီ (USDP) pan mun 28 cih bangin dem ding uh hi.
Dec 28 ni-in kibawl ding kiteelna ah Hakha township leh Tedim township pen khenpi masa hi dinga, Tonzang township, Falam township leh Thantlang township pen khenpi nihna hi ding hi. A cianlai township te ah bang hun ciang meekuang kilui ding cih kitel nailo ci-in NCC tangmi khat in gen hi.
ZCD party pan telcing ngei Pu Pau Lun Min Thang leh Pi Cing Ngaih Mang te in tutung kiteel ah ZNP min tawh Amyotha Hluttaw မဲဆန္ဒနယ် အမှတ် (၁) pan in dem ding uhhi.
……………………………………
➤ SAC IN LETPANCHAUNG KHUA HAL
SAC in Kalay township, Letpanchaung khua ah October 20 zingsang lam in khuasung lut uh a, innhal uh ahih manin mipite gal tai uh hi.
SAC galkapte pen Yarzagyo lam panin a lut uh ci hi. Mipi galkapte zawh ahi Kalay- Khampat- Tamu lamzikpi pen SAC in munluah kik nuam ahih man in galkap tampi tawh kuan uh ahi hi.
Kalay township ah mipi khat in “Khongta khua (ခုံသာရွာ) leh mundang pan gal hong kitai ahih manin Kawlpi khua sungah mipi tam mahmah hi” cih pulakna nei hi.
SAC in October 16 kiim pan Kawlpi ah galkap vanleng leh galkap honkhat zong behlap uh hi.
Tulaitak in galtai mipite, piteek puteekte, naupaai nupite leh naupangte adingin nek leh dawn, zatui zaha leh vanzat tawmm ding ki tangsam hi ci-in Kalay Township People’s Strike Steering Committee (KPSSC) makaite in tangko uh hi.
Galtaite ading a kisam bangin vaipuak laktheih nadingin KPSSC in vaipuak la dingin Emergency Response and Assistance Team kipawlna khat phuan uh hi.
Gamdang om mipite, kipawlna tuamtuamte leh gamsung om akua mapeuh in huhtheih bangin huh ding leh panpih ding kisam mahmah hi ci-in KPSSC in ngetna nei hi. A panpih nuam leh huhna a pia nuamte in NUG Pay, SDB Bank pan in lauhuaina omlo in ki khak thei ding cih zong pulak uh hi.
……………………………………
➤ 14 BILLION MMK MANH KHAMTHEIH KIMAN
Shat state, Maiyhee khua (မိုင်းရယ်မြို့) pan Kalay township ah a kipua 29.23 kg agik khamtheih leh Antidepressant pills zatui mal 65.2 lakh kiman hi ci-in Central Committee for Drug Abuse Control (CCDAC) in October 23 in tangko khia uh hi.
Oct 14 nitak nai 5:30 pm pawl in CCDAC in thuza-in mipi galkap PDF te tawh Kalay township, Gyeekong khua (ကျီကုန်းကျေးရွာ) gei ah Nyein Chan Maung (ကုလားလေး) in a hawl Forland mawtaw a sitna uh pan 65.2 lakh aman Antidepressant pills zatui man uh a, a pawlpih ahi Htoo Aung Kyaw zong Nyaungpinsin khua (ညောင်ပင်စင်ကျေးရွာ) kim ah man uh hi. Van pua tenih thu a sit uh ciangin van nei pen Mantong township (မန်တုံမြို့နယ်) ah a om Joshua a kici min nei khat hi-in gilbeem ah koih ding zong gen uh hi.
CCDAC mah in Taungphila veng ah Forland mawtaw a hawl Kyaw Htee zong a sit uh leh 29.23 kg a gik khamtheih man uh a, tua teng a lei ahi Pa Pau Sian Hau (Ko Chin) zong setmuzone paina lampi ah man uh hi.
Vankham puak ding tavuan la လီလေး pen Oct 13 ni nitak nai 4:30 pawl in Kalay townshp, မင်္ဂလာဥယာဉ်ရပ်ကွက် ah man in, Oct 16 ni nitak nai 5 pawl in Soe Myint (ကုလားလေး) zong Laship veng 7 na sungah man uh hi.
Vankham a kiman vekpi pen 14 billions MMk val man dinga, hih thu tawh a kizom midang aom laite zong kikan lai hi ci-in CCDAC in gen hi.
……………………………………
Source: Chin World / Khonumthung Burmese / BBC Burmese
