Hello! Dam maw Zomi! Tedim Post pan hong muakkik ung. Tuni Phal kha ni 19 (Nipini) October 19, 2025 kal khat sung thuthangte genkikna hong nei ning.
A kihel ding thulute in-
➤ TONZANG KHUA AH SAC IN VANLAM TAWH A DONA HANG IN MIPI TEENNA INN 3 KISIA
➤ HAKHA KHUAPI MYOMA PALIK LEN AH CHIN MINAM THAUTAWI KIPAWLNA TE IN DO UH A, THONGKIA MIMAL 15 HONKHIA UH
➤ SAC IN HAKHA TOWNSHIP, VANHA KHUA AH BOMB A KHIATNA HUHAU IN HAKHA TOWNSHIP SUNG A PILSIN SANGTE THEMVEI KIKHAK PHOT
➤ MATUPI TOWNSHIP AH SAC IN VANLAM TAWH DO IN A LIAM A BAI PAWLKHAT OM
➤ SAC IN CHIN STATE SUNG AH MIPITE OMNA MUN TE VANLAM TAWH DO-IN MIPI GENTUAK IN A BAWLNA UH HANG IN KITEELPI AH KUAMAH KIHEL LOH DING CDF-HAKHA IN LAISUAH
➤ CHIN NATIONAL DEFENSE FORCE NO.1 GALKAP TRAINING TUAHPAWI KIBAWL
……………………………………
➤ TONZANG KHUA AH SAC IN VANLAM TAWH A DONA HANG IN MIPI TEENNA INN 3 KISIA
Chin state, Tonzang khua ah SAC in October 14, 2025 sunnung 2:16 pm hunpawl in Jet Fighter khat tawh bomb tang 2 a khiatna hangin mipite teenna inn 3 kisia a, mipi te bel bangmah cilo hi.
“Bomb tang 1 pen Tonzang khua sung a om meiphelh zum kiim ah tu-in kitam pah hi. A dang tang 1 pen ahihleh Khuavung leisan veng sung ah tu-in kitam hi. Tu-a a khak inn te ah innngak kuamah a omloh laitak hi-in mipi bangmah cilo hi” cih Tonzang khuasungmi khat in pulakna nei hi.
Tua khit a kipanin meilphelhzum kiim leh Khuavung veng sung a teeng khuasungmite mundang/vengdang ah tanau te kiang kituah in beel phot uh hi cih zong pulakbehna nei hi.
……………………………………
➤ HAKHA KHUAPI MYOMA PALIK LEN AH CHIN MINAM THAUTAWI KIPAWLNA TE IN DO UH A, THONGKIA MIMAL 15 HONKHIA UH
Chin state, Hakha khuapi ah CDF-Hakha leh thautawi kipawlna pawlkhat te ki pawlkhawm in October 16, 2025 ni zingsangtung 3:00 am pawlin Myoma paliklen dokhawm uh a thongkia mimal 15 te honkhia zo uh hi cih CNF/CNA thugen khuan nei Salai Htet Ni in pulakna nei hi.
Hih kidona hangin SAC lampan mimal 5 leh mipi galkapte lampan mimal 1 in ong nusia hi. Galvan pawlkhat in ki ngah cih pulakna a om hangin a ki telcian in pulakna omnai lo hi.
……………………………………
➤ SAC IN HAKHA TOWNSHIP, VANHA KHUA AH BOMB A KHIATNA HUHAU IN HAKHA TOWNSHIP SUNG A PILSIN SANGTE THEMVEI KIKHAK PHOT
Chin state, Hakha khuapi tawh 30 miles a kigamlatna mun Vanha khua a om pilsinsang ah SAC in October 13, 2025 zingsang 10:30 am hunpawlin bomb khiat hi. Laisin laitak in a om kum 9 a pha naupang no khat leh kum 12 a pha naupang khat in ong nusia pah hi. Siamah khat leh sangnaupang khat in zong liamna nasia ngah a, a dang liamna ngah zong tampi om lai ci hi.
SAC in pilsinsang te ngimdiak in dona nei uh ahih manin CDF-Hakha Central Council, Department of Education khutnuai a om pilsinsang te khempeuh themvei sung kikhak phot ding hi cih zong October 13, 2025 in pulak khia uh hi.
……………………………………
➤ MATUPI TOWNSHIP AH SAC IN VANLAM TAWH DO IN A LIAM A BAI PAWLKHAT OM
Chin state, Matupi khuasung mun khat ah October 10, 2025 nitak 8:00 pm pawlin SAC in vanlam tawh bomb khiat in mipi a si, a liam om hi cih khuasungmite’n pulakna nei hi.
Matupi khua pen CB ah a kipawl MRO/CDF-Matupi in a uk laitak hi a, tu a vai tawh kisai in mi bangzah si-in liam cihte bangmah gentelna nei nai lo uh hi.
……………………………………
➤ SAC IN CHIN STATE SUNG AH MIPITE OMNA MUN TE VANLAM TAWH DO-IN MIPI GENTUAK IN A BAWLNA UH HANG IN KITEELPI AH KUAMAH KIHEL LOH DING CDF-HAKHA IN LAISUAH
SAC in a bawl kiteelpi vai tawh abuai sung mah un Chin state huam mun tuamtuam ah vanlam pan bomb khiat kawikawi uh hi. Tua bang gamtatna te in thumanna tawh kibawl kiteelpi ahih loh lam kilanghsak mahmah hi. Mimal kim kuamah kiteelpi ah kihel loh ding leh a kihel a kuamapeuh CDF-Hakha in a kilawm bang in vaipuak kila ding hi cih October 14, 2025 ni-in CDF-Hakha in laisuahna nei hi.
Hakha township, Vanha khuasung, pilsin sang ah October 13 in vanlam mah tawh bomb a khiatna uh hita leh mipi te hu ding, kem ding cih lam hilo in naupangte pilsinna mun ah ngimna nei tak in a dona te uh in mipi tung ah itna, veina nei lo uh a hihlam kilangh sak hi. Tua te in kumpi thukhun (law) tawh kituak lo hi ci-in zong CDF-Hakha in laisuak sak hi.
……………………………………
➤ CHIN NATIONAL DEFENSE FORCE NO.1 GALKAP TRAINING TUAHPAWI KIBAWL
CNDF ii No.1 galkap training nambat (1/2025) training tuahpawi September kha kaltawpna, 2025 ni-in kibawl thei hi cih CB ah a kihel ahi CNO/CNDF in pulakna nei hi.
“Mipite lungtup ahi Established of a Federal Union, liangko kikimna ngah theih nading cihte mitsuan in kum 4 sung tawntung gal kido, gal kikuan in mipi galkap tampi te in zong a nuntakna uh ong pia khin uh hi. Tu in zong nuntakna itsiit bawllo in gam a ding in hangsan tak mapang ding hi hang!” ci-in traning tuahpawi ah CNO/CNDF galkap makai pa in thapiakna nei hi.
……………………………………
Source: Chin World
