Gam kha 11, 2026 ❖ THE TEDIM POST
Tedim township sung a om Suangsang khuami Pa Pau Ngaih Mang pen zanhalni Gam kha (June) 9, 2026 ni-in Tungzang khua pan a ciahna lampi tung ah kivua lum hi cih thu kiza hi.
Hong nusia Pa Pau Ngaih Mang pen zanhalni nitak lam nai 5:00 pm kiim pawlin Tungzang khua ah a pai to hi a, hong ciahkik lam ciang, Tungzang khua leh Citui lui kikal mun ah a kivua lum hi ci-in khuamite pulakna tungtawn in kiza hi.
Pa Mang tuahsiatna vai khuamite a zak phet un delhto pah uh a, tua ni zan 12:00 am kiim pawlin a luang pham uh hi cih kiza hi.
Hih thupiang tawh kisai-in khuamite leh online tung pan mi tampi in ZNA thautawi kipawlnate’ khutma dingin ummawh uh hi. Tua banah, ZRA/O panpih mi pawlkhat in zong hong nusia Pa Mang pen ZRA EC i mizat muanhuai khat ahih manin ZNA te’n hong kaplup sak uh hi ci-in zong mawhsakna pulak uh hi.
Hih mawhsakna tawh kisai ZNA in zanni Gam kha 10, 2026 ni-in amau khutma hilo hi cih thupulakna social media tung ah suaksak uh hi. Tua a suahsakna sung uh ah amau’ khutma a hih lohna, Pa Pau Ngaih Mang sihni-in ZNA galkapte gam kuan gam vak omlo cih thu teng akihel gencianna tampi zong nei uh hi.
ZNA thautawi kipawlna pen a beisa Dopi kha (April) 7, 2026 ni-in a kipan khia Tedim gam sung ah phualsat thautawi kipawlna thak khat ahi hi.
