Dota kha 28, 2026 ❖ THE TEDIM POST
Myanmar gam, SAC in ukna a buluah khit a kipan Dota kha(March) dong Chin State sungah hong nusia naupangno 106 bang pha hi. Tua lak ah vanlam pan kidona hang in hong nusia tam pen hi ci-in CHRO in Dota kha 27, 2026 ni-in pulakkhia hi.
Ukna kibuluah khit a kipan Chin State sung ah tuni dong kum 18 a cing nai lo naupangno a si 106 bang pha hi. Vanlam pan bomb khiatna hangin a si 53 pha a, hih pen a si zah i a lang bang pha hi ci-in pulak uh hi.Tua banah SAC in thaupi tawh a kapna hang leh bomb puakkhapna hangin naupang 38 in hong nusia a, thau kapna hang in naupang 15 bangin nuntakna suplawh hi. Hih a site lak ah naunawitep laite zong kihel hi.
2025, No kha pan 2026 dong SAC in Chin State ah vanlam pan nasia takin a kapna hangin a si tampi hong khangto hi, ci-in CHRO in gen hi. Tua banah 2026 Tun kha ni 10 ni in Thantlang khua Double-tap bomb tawh a dona hangin khuasungmi guk in hong nusia a, sangnaupang li a kihel mimal sagih in liamna ngah hi.
Myanmar gam sungah SAC te in 2025, No kha sung bekbek in zong vanlam pan 184 vei do a, mipite 130 bang si hi, ci-in NUG in gen hi. Tua a site lak ah naupangno 17 kihel-in 2026 kum kipat lam dong SAC te-in mi omna khuate, sangte, biakinnte ngimin vanlam pan bomb khiat uh hi, ci-in pulak uh hi.
2025 kum pen ukna kibuluah khit nungah vanlam pan dona hangin mipi a si a tampen kum hi-in, 2026 kum Dota kha dong a si kibehlap lap lai hi, ci-in AAPP in gen hi.
SAC in galphual-ah a lelh uh ciangin vanlam tha tampi zangin mipite ngim-in a kapna uh hangin 2025 kum bei lam pan 2026 kum kipat kikal naupang no kihel mawhna nei lo mipite in a nuntakna uh suplawh in kum dang sang 50% bang kahto hi cih zong genbeh uh hi.
Source: Chin World
