A beisa kal nih kal thum sungin Iran gam ah, Iran mite in a sum manneihna uh a kiam den nungin lungkim lo-in lungphona nei uh hi. Hih lungphona nasia semsem a, tu-in gambup phial in lungphona neita uh hi.
Iran galkapte in hih gambup lungphona ah mipite mit a sipsak nadingin meikhu bomb (tear gas) khawng lawn ziauziau uh hi. Mihing khat ngah ding hamphatna tawh kisai nasem kipawlnate in a genna uh ah, hih lungphona ah mimal 500 bang kithat khin hi, ci uh hi. A kithat lakah a kihel khat ahi Rubina Aminian pen puan zem leh puan khui sangnaupang khat hi-in, a innkuanpihte in a luang la pah uh hi.
Tua banah, January 8 a kipan internet bangmah kingah lo-in phone call zong kingah lo hi. Hih hangin khua tuamtuam pan a kikhahkhia lungphona video te kien thei nawn lo hi. Tua ahih manin bang teng piang hiam cih zong kan hak semsem pah hi. Gamdang thukante zong Iran gam a thupiang tawh kisai lai a gelh ding uh pen Iran kumpi in kham a, Iran mi thukan semte in zong a kumpite uh deihlohna thu a gelh uh ciangin vauna leh kinopnehna tuak pahpah uh hi.
Iran mi pawlkhat in SpaceX te Starlink te zang thei uh a, lungphona video tomno pawlkhat puak thei veve uh hi. Hih thu Iran thuneite’n a zak uh ciangin Starlink pawlkhat suksiat sak uh hi. Iran kumpi in mei a mit-sip sak hun ciangin zong mi pawlkhat in thukante kiangah thuthang a theih bangbang uh puak zel uh hi. A gamsung uhah internet a kingah nawn loh a kipan, Starlink leh mei mit sunga thukante kiang thu kipuakte bek tungtawnin thuthak kithei ahi hi.
Hih bang vaiteng tawh kisai-in Iran kumpi in gambup lungphona pen US leh Israel-te in tha a piak manun a piang thu hi, ci uh hi. Tua banah lungphona a kihel mi pawlkhat zong US leh Israel tawh kipawlin lungpho pihte a that uh hi, ci-in gen uh hi. Iran kumpi in hih bangin thu a gen hangin, lungphona video te tungtawnin Iran galkapte in lungpho mipite a kap laitak uh kimu thei hi.
US President Trump in a tungin lungphona nei mipite panpih dingin US a kiging khin hi, a cih hangin, Iran kumpi tawh zong thu kikupna neih ding sia sa lo hi, ci hi. Iran kumpite in ahih leh UN te kiangah US President Trump thugen thuman hilo hi, cih laikhakna nei uh hi. Iran Foreign Minister pa in a thugenah zong Iran gam pen gal do dingin kiging khin a, ahih hangin gal kidona om ding a ci hi tuan kei ung, ci hi.
Source: BBC Audio
……………………………………
