Gam kha 9, 2026 ❖ THE TEDIM POST
Tedim township, Tedim – Rihkhawdar gamgi kikawmna lamzikpi tung a om, Manipur gun kantan in a kilam Mansuang lei ah zanhal ni Gam kha (June) 7, 2026 zingsang nai 4:30 am kiim in mine tawh puahkhapna khat om a, kuate khutma cih tudong kithei nai lo hi.
Mansuang lei tawh a kinai pen Lamzang khua a om ZYA kipawlnate’n social media tungtawn in a pulakna ah zingsang nai 4:30 kiim in a ngaih mahmah khat ging a, inn na ngawn kilok zo hi ci-in pulak uh hi. Hih thupiang tawh kisai ZYA Lamzang in a kan kawikawi uh hangin kua khutma cih kikan khia zolo hi ci-in zong gen uh hi. Tua banah, hih puahkhapna pen galkapte’ khutma a hihloh lam kilang hi ci-in zong pulak beh uh hi.
Hih thupiang tawh kisai in Mansuang lei a om te genna ah bel, “A ging khit teh Laitui khua lam ah cycle khat to tai bel om hi,” ci-in pulak uh hi.
Hih mine tawh puahkhapna hangin leibul pawlkhat kisia in, a dang bangmah kisia lo-in lei zong muanhuai lai ahih manin mipite’n kitawn thei veve lai hi cih kiza hi.
Tedim – Rih kikawmna lamzikpi pen tulaitak in Rihkhawdar a uk CDF-Hualngoram thautawi kipawlnate in bitna ding ngimna (security) tawh paisuk paitoh theih hun ki ciangtan hi cih thu Zing kha (May) 21, 2026 in a pulak khiat uh ahi hi. Tua khit nung Gam kha 2, 2026 ni ciang in a ngeina bangin lampi hong kik uh a, tua zawh a sawt lo mah in hi bang puahkhapna a piang ahi hi.
Mansuang lei a lui pen a beisa Gam kha 8, 2024 ni-in SAC galkapte in mine tawh puakkham sak in a suksiat ngei uh ahi hi. Tua ahih manin 2021 NLD hun lai a kilam ukna buluahna hangin maban kizom suaklo lei thak tot theih nadingin khuamite in amau hanciam tawmna tawh a kizang thei pak (temporary) dingin a puahtoh uh ahi hi.
Photo: ZYA Lamzang
