Philippines gam, Cebu khuapi-a om leivung paihna mun, Binaliw a kicihna ah a beisa kal sungin mencipna hangin mimal 11 bang si khinta cih thu kiza hi.
Mencip laitakin tua mun ah nasem mi za val bang om a, liamna a ngah mimal 12 kihonkhia khin zota hi. Ahi zongin mimal 20 val bang kimu nai lo hi.
Meiphelh nasem khat in a genna ah, ni thum khit ciangin lei ton tampi nuai-ah a awk lai mite a nuntak lai ding uh bel uphak hi, ci hi. January 12 in leivung laka a zonna uh ah a awk mite hing lai dingin ummawh uh cih thu Cebu khuapi hausapa Nestor Archival in gen hi.
Hih mencipna a hang pen thuneite in hoihtakin a kan ding mipite’n lunggulh uh a, Philippines gam in leivung hitaleh nin a paih dante uh zong kibawlpha ding lunggulh uh hi.
Tua banah, Philippines gam thuneite in zong mencip khit ciangin tua muna nasem company ahi Prime Integrated Waste Solutions, Inc. te a nasep uh a khawlsak nadingin thu pia uh hi.
Mencipna a hang lianpi pen a kitheih nailoh hangin, Mines and Geosciences Bureau te thukanna tawh kizui-in mencipna a hang pen tatsat lo-a guah a zuk hang hi, ci-in pulakkhia uh hi.
Source: BBC
……………………………………
