Taang Nang Sian Thawn
Thutheihna pen Thuneihna kipatna hi.
Eimi lak-ah kigen thei zel thukhat pen, ‘Chin state sungah kampau khat azangh khawm thei lak-ah milip tam pen hi hang’ cih pen kipah lam leh thuneihna sangzaw (higher power) thei cih lam-in kizang mun mahmah hi. Atatak in ci leng thuneihna (power) pen milip tamna tungah kinga lo-in thutheihna (information/knowledge) tungah kingah zaw pek hi. IT (info-tech) hun semsem ah bang thuneihna pen thutheihna tungah kinga tektek lai hi.
Tukum Chin state ah adiakdiak ei leilu lam (northen) pan Tan (10) zozah ong hoih zaw deuh-in Tan (10) azo khempeuh lak-ah 23.87% (mimal 626) ong kihel hi. Chin State bup township (9) lak-ah Tedim in azo mimal 552 tawh Top (1) mun hong ngah-in ih lung dam mahmah hi. Adang state leh region dangte tawh et kak leng bel Tan (10) zo pen ki tawm lai mahmah hi.
Tan (10) azozah kitawm mahmah napi, ngaihsutna hoihlo pawlkhat ahi: numei hihna tawh tansang kah saklohna, sum deih baih luatna, Nu-le-pate in tate’ tha duh baih luatna, leh Nu-le-Pa panpih tantan lohna-te hangin Tan (10) zo khempeuh tansang ong kah zom lo kha uh aa pam maih mahmah hi.
Tua ngaihsutna hoih lote lak-ah amasa pen ahi ‘numeite tansang kah kul kei’ cih pen tukum Tan (10) zo te tung ah zang ding hi zen leng, dah huai pha diak hi. Banghang hiam cih leh tukum Tan (10) zo lak-ah Tedim Township pan numei pen 65% hi-in Tonzang Township pan 62% hi-in numei Tan (10) zo tam zaw tham pek hi. Hih Tan (10) zo numei teng Tansang ong kah zom kei leh uh Zomite tulaitak-a mite lak-ah ih dinmun sang khasiat huai zaw lai thei ding hi.
Ahang tatak pen bang hiam cih leh, thuneihna pen mimal meetang tung pan hong luang hi aa, tua mimal thukhentatna pen thutheihna tungah kingahin tua thutheihna pen tansang pilsinna tungah kinga phadiak hi. Atam zaw ih numei teng tansang hong kah kei zen leh atam zaw in thutheihna ong neilo ding uh-a, atam zaw khentatna ahi democracy tawh thu khensat lai ih hih manin, thutheilo atam zaw teng’ thukhensat a zuizui ding ih hi-a, naak dah huai mahmah hi.
Ih gen nop bulpi pen #thutheihna pen #thuneihna kipatna ahih manin kuamah deidan om lo-in, NUMEIte zong pasalte mah bangin TANSANG kahsak ni. Thutheihna ih neih ciang bekin; thuneihna ong khang ding na hipan hi.
Tansang pilsinna thuluii masa hiah kisim thei hi: https://bit.ly/3iMt36U
Data Source: Chin State Education Office
