(Paunak 12:27)
“THEI GIGE NI”
Rev. Nang Lyan Kap, Advisor, ZYA-Tedim
1. PASIAN in ama nasemte zangin kumpi leh uliante kipsak hi. Siampi Samuel in SAUL leh David kumpi a suah nadingun sathau nilh hi (1Samuel 10:1; 16:13). Siampi Zadok in Solomon sathau nilh hi (Kumpi-te Masa 1:39). Pasian nasemte tawh khut kilenin Kumpi asemte khempeuh lawhcingin a mipite cithei uh a a gam uh zong khangto in kizahtaak mahmah hi. Tuni dong USA kiteelna zo a President a sem dingte pen Pasian’ nasemte’n Lai Siangtho tawh kiciamsak ngiatngiat lai uh hi. (Hih munah Pasian’ nasemte’n guptuam paihtuam i neih het loh ding thupi mahmah hi. Migina leh mipi phattuamna ding a sem ngam leh a semzo ding makai Pasian in ong piak nading thu a ngetsak dingte bek ihi hi. (Kei zong abeisa in thu ong ngetsak in ong ci Party khempeuh thu ka ngetsak tek a, a gualzo leh alawhcing zolo om tuak lel hi). Pasian deihsakte’n ngah lel hi. (Daniel 4:17 “Amah in a teel peuhpeuh a neupente nangawn kumpi asuaksak thei hi”. Teelcinglote zong asep ding om tek lel hi.
2. Party khempeuh ah na beh na phung, na khuapih na tuipih, na Pawlpipih leh na awkaih kibatpih om dimdiam hi, cih thei gige lel in. Kam hoih lo zang zawzen a na ko gawp ding om tuan lo hi. Tu tung (2020) bang pen Party candidate-te a tamzaw “Tuiphum” Pawlpi mi ahi uh hi: gentehna-in:
1. Pu Hang Khan Lian,CMBC = NLD (a U Ci Cin zi leh U Kamlian zi unau)
2. Pu Gin Kam Lian,CMBC = ZCD
3. Pu Kam Lian Thang, CMBC = CNLD
4. Pu Kha-Kham CMBC-CNLD
5. Pu Thang Tuan Pau, SBC =NLD
6. Pu Ai Sian Pau,SBC = CNLD
7. Pu Hang Pi, CMBC =USDP
8. Pu Do Suan Mung, CMBC= NUP
9. Pu Michael Mang Hen Dal, SBC-Yangon = NLD
10. Pu Mung Khan Suan, SBC = UBP
11. Pu Kap Khen Pau, (Tedim Tuiphum & Pu Piang Suan Mung
12. Pu Kham Suan Piang = UBP (Adang tampi zong om lai)
Hih meekuang luidingte in mipi ong kitelkhialh sakloh ding uh thupi mahmah hi. Ei mipite zong kitawng kha het loin i candidate-te mah bangin i lungsim tawngah kitelsiam khinkhian lel ni! A Thupi penpen ah, Joseph, kumpinu Esther leh Nehemiah bang a hong uk Kumpi peuhpeuh i maipha a muzo a a mipih leh a gam ading na a sem ngam leh a semzo dingte thei a (deih a) I teel ding ahi hi. Tonzang myone sung a Uliante’ maipha a ngah Pi Cing Ngaih Mang bang in Lamlam (transport)a minister-te U Khin-Thet, U Win Khaing, U Khan Zaw cihte bang Haiciin khua dong tuuk laitak apaipih manin khua-te tampitak in kultar-lampi, concrete lampi leh suangphah lampi nei zo pah uh ahih manin mipite lungdam mahmah uh hi. Tedim myone ah hih bang dan MP iki naksap mahmah hi.
3. Pasian’ piak ahih nak leh na muan loh pen ahi zong, Mee na piakloh pen ahi zongin ong ngah lel ding uh hi. “A tawpkhakna-ah Sangpen Pasian in mihingte kumpi gamte uk a, a teel peuh peuh kumpi a suak hi ci-in a phawk thei hi” (Daniel 5:21). Mee i pia-in i pia ta kei zongin a ngah peuhpeuhte i “Zahtaak leh i Lungdampih” ding pen picin vai leh pilvai mahmah ahihna thei gige in! Gentehna: Pu Cin Sian Thang leh Pu Hau Do Suan’ te a gensia leh akoko ki om mawk in hoih het lo hi. Mihing akicing ki omlo hi. Amau thuakzah thuak ngam hetlo ding leh amau tuntan tungzo hetlo ding ihih teh i “Lungdampih theih zah leh i Pahtawi theihzah a Pahtawi ding te hi cih thei gige ni. Ahilo pipi-a kipumphatna (flattering) bel zang kha kei ni.
4. Teelcing a MP ngah dingte’n zong mee ong piate leh ong pialote cih bangin kuamah ong deidan het kei un (kidawm, ciam teh – ok)! No mee ong pialopi uh teh a ci MP om ngei in kipakta lo hi. Mee nong piak loh uh hang Lampi & Sang ong pia ning a ci om in kinuam mahmah in zong kipaakta lel hi.
5. Duhhop huaiham a angsung bek akhualte aw mipi in ong pakta lo hi cih na thei gige un! Mipi deih pen khua leh tui puah a mipite’ ading a sep theih zawh zahzah in (sep theihloh bel lam enlo) hanciam a a semte ahi hi. Kei mimal in bel nasemte bek pakta ing!
Paunak 12:24 & 27 ah, “Mi thanuamte a vang lian a, a thadahte sila suak hi.” Thadahte atup tung ngeilo-a thanuamte in a deih uh ngah hi.” na ci hi. I DEIHTE I NGAH NADINGIN ONG THANUAM MAHMAH TA UN! Lungdam!
Tutung Guest Editorial hong gelhsak Siapa pen ZYA-Tedim Thudotpi khat hi a, tulaitakin Tedim khuapi bulphuh Timothy Bible School & Seminary President hi-in EBC Pawlpi, Myoma ah Senior Pastor ahih banah International Partnership Ministries tawh nasepkhopna Asia Regional Director zong ahi hi. USA gam a om Bob Jones University ah sang kah nuam mahmah hi ta leh Myanmar gammite VISA haksat hun lai ahih manin Visa a ngah zawh lo teh “Topa aw kei Bob Jones University ah kei hong puak lo ding na hih leh Tedim ah Bob Jones Universsity hong puak in…” ci-in thungenpa ahi hi. Pasian in thupha pia in Bob Jones Jr te khawng mah tawh kimaingap takin nasem khawmin Tedim hong etlawmsak leh vang hong neisak building hoihnonote lamin Zolai ngiat tawh Pasian’ thu nungta hong pantah Siapa ahi hi. US gam 3 vei a zin sungin Mangkang Pawlpi 134 leh University 3 ah Pasian’ thugen ngei hi. Zolai tawh Pasian’ thu tampi hong bawlakte sung panin “The First Zomi Systematic Theology” pen ZCLS in “BOOK OF THE YEAR 2005” pahtawina pia hi. Sianu Nang Lam Cing tawh tapa 3 nei uh hi.
