Rev. Dr. Thuam Khan Thang
Advisor, ZYA-Tedim
(3 mins read)
1. LAI SIANGTHO HILHNA
Piangthak cih kammal pen 1970 khit i gam ah a kizang mahmah kammal ahi hi. Ih gam Kha khanlawhna hangin Piangthak, Pianglui ci-in kamzat hong kizang hi. Piangthak cih in Tapidaw cih kammal thak ahi hi. Jesu Khris Honpa leh Gumpa a sanna tawh tapidaw/piangthak upna kipan ahi hi. A umte, Pasian tapa tanu za ngah ci hi.
Mawhna mai-in, Pasian hehpihna ah nungta, khangto ci hi. Vantung min sazian ah kikhum ci hi. Thu umte’ gammi hihna (Citizenship) pen Van tung ahi hi. Leitung ah nuntakna pen Leibuuk ci hi. Gupngah kitelna tawh anungta mi in gamnih ateeng (Dual Citizenship) ngah mite ihi hi. Vantung gammi hihna tawh leitungah tawmvei i tam sungin Vantung hoihna, Pasian itnate a kilangh sakdingte ihi hi.
2. IH GAM LEH PIANTHAKNA
Ih gam ah Pasian thu hong tun kum 200 valta a, (1813-2020) tapidaw Gam ihi zo naikei hi. Asia gam ah Kawlgam leh India tapidawte zawngkhal pen hi ci-in pawlpi khanna ente in ciamteh hi. Kawlgamah taipidaw gam a kici Khamtung gam niam pen ci lailai hi (UNDP). Ei nung a tapidaw suak gamte in hong makhialh khinta uh hi. Indonesia gamah tapidaw mimalin a tam luat loh hangin neih le lam tawh a gam uh makaih zo uh hi. Company nei tampite Pasian thu-um te hi uh hi. Vietnam gam ah Pasian thu-um akhan tohna zui-in agam uh zong khangto hi.
Vantung min sazian a om leibuuk a nungta lai eite in ih nisim nuntakna kipuah lo, Pasian itna taangsak lo ihih manin i khangto kei hi. Khangto lo ihih manin i zawng hi. Piangthak/tapidawte hau hamtang ding cih ahih loh hangin i zawng lua deuh hi. I niam lua deuhhi. I nangh lua deuh hi. Thuhilhsiam tam mahmah napi hang i nuntakna in phattuampih lo hi. Kibangci puah ding ihi hiam?
3. TULAI TAK KHUAHUN
Leibuuk ah i ten sungin khuahun kikheelkheelin kilaihlaih hi. Tulaitak i khuahun in Myanmar gam kiteelkik ding hun leh US kumpi kiteelhunte tawh kinai mahmah hi. Myanmar gam kiteel ding (November 8, 2020) naita a, party te in mee a ngah nang un amau party hoihna genkawmin party dangte hoihloh tawh gawmkhawm hun ahi hi. Facebook sungah, party thu bebek kigen a, athei tawh athei lotawh upmawh bangciatin kigelh hi. Thuhoih deihna tawh a gelh aom mah bangin party dang khatpeuh kogiap giap a gelh zong tam hi. Theihna sangin upmawhna tamzaw hi.
Hih bang hunin tapidaw/piangthakte in gam hoih nading, khantoh nading, gam makai hoih neih nadingin Thungetna tawh ma i pan ding hun ahi hi. Party tuamtuamte in mee ngah nading hanciam ciat ding hi a, ahi zongin party dangte galbawl ding hun, langbawl ding hun hilo hi. Ei tup leh sawm ciat pulakna tawh mipite telsakin, mee i ngah sawm ding ahi hi.
4. THUPHA PUAZOTE HI NI:
Thupha ngah lo ihi kei hi. Ei tawh kituakin i ngah hi. Sum le pai, pilna siamna, min le za, neih le lamh i ngah hi. Ahi zongin i pua zo kei a, i kem zokei hi. Mikangte Pasian nasemten akhang khangin sem hi. Kala haute khang sagih hau kici hi. Ei khang bangzah hau? Min le za zong i pua zo kei phadeuh hi. Uliante’n zu nek loh phamawh i sa hi. Zu le sa nek zong siamlo phadeuhin i sih dongin i ne hi. Sehsuahpiak thupi i sa kei hi. Pasian hong piak ahih lam phawk nawn loin ei le ei hi i kisa baih phadeuh hi. Gam politic makaite bangin mee ngah mateng thu nangetsakun nawh cih a angah khit uhteh thunget zong kisam sa nawn lo uh hi. Gam puah ding a kiteel, ama angsung bek tawh hun bei ta hi. Bangci thupha ngah ding?
THUKHUPNA:
Pianthaknate in Jesu Khris Hohpa leh Gumpa in sang a, Lai Siangtho hilhna bangin nuntak paisuak ding ahi hi. Piangthakte in Vantung gam mi, leibuuk ah tawmvei taamlai te ihi hi. Tawmvei i tan sungin Vantung gam nopna, Pasian itnate midangte athei sawnsak dingte ihi hi. Pasian deihna bang anungta mite in Vantung hauhna zong ciam ding ahi hi. Vantung thuphate puazo dingin kipuah ni. Gam makaite in zong Pasian piak ahih lam thei-in, Ulian hihna puazo ni. Pasian nasemte in zong i lawhcinnate kepsiam ni. Thupha puazo ni. I vekpi in Lai Siangtho ah ciahkik ni. Amen.
