By Rev Thang Van Lian
May 28, 2016
Bang hangin sang tawp na hiam hong kici leh nuntak haksa lua hi, cih atamzaw hi dingin up huai hi. Ahi zongin hih dinmun kantanin haksa ta leh sang a kah teiteite mah lawhcing zaw uh hi. Kham lam hi ta leh zang gam lam hi ta leh lokhawhna pan an khing kham khuate panin mipil leh mihau khangkhia sangin nektawm zong antaw zel khuate pan mipil leh ulian tam zaw hi, kici hi.
Tulai khuahunah kum khat lokhawhna pan ankhing kham, cih ciang tawh khangual kiban zo nawn lo hi. Tan sawm on ciang nangawn kicing nawn lo a, buaih khat beek neih hamtang kul ta hi. Buaih nei tektek zong computer maw, Mangkam maw a siamte lawhcing zaw lai uh hi. Nasep ngetna ah zong phut khak tuahkhak aneisate kila masa zaw hi. Leitungbup atamzaw kitaitehna ah zong nasep hoih ngah nadingin sosial organization khat peuhpeuh ah volunteer sem ngeite kideih masa hi. Myanmar ah zong khuahun kikheel zui-in hi bang dan kidemna leh kitaitehna sung lut ta ihih manin khuaphawk a hanciam tantan hun hong tung ta hi. A limlimin mi thadahte leh mi lungkia baih luate adingin leitungah lawhcin nading lampi haksa mahmah hi. Thadahna leh zulhtatna khen a om lawhcinna pen thanuamna leh hanciamna tawh delh kul hi.
Gamdang tung Zomite nuntakna i et ciangin zong nuntak haksa ta leh sangkah a certificate khat beek a ngahte in nasep hoih ngah zaw deuh uh hi. Khantoh nading lampi om zawdeuh hi. Tua hi loin muh tawm tawh sum thalawh pahte adingin khantawn thatang suang a sum thalawh ding bek mah lampi om hi. Tha tang tawh sum thalawh sangin pilna ahih kei leh siamna khatpeuh bulphuh a sum zonna panin sum muhna gina zaw tham hi. Tua hi a thatang bek suang a sum zon hun bei-in siamna tawh kikop nuntak zon hun hi ta ahih manin khangthakte in sang kah tangtang ding mah hanciam huai hi. Nu leh pate in zong tu dinmunah nuntakna haksa mahmah hi ta leh tua haksatna khanggui a kikheel theih nadingin naupangte sangkahsak tantan kul ahi hi.
Sangkahna ah laitan sang a zote pen a pil veva akhuak hatte sangin ahanciam tantante hi nuam zaw uh hi. ‘Tuanu/pa pen tun hi ciang atun hangin ka sangkah lai uh lai nak hai hi ven…,’ cih kigen na za ngei kha ding hi. A hanciam tantante lawhcing cihna ahi hi. Ei lah hong huh hong pantah ding om lo a… cih paulap hoih luate paisanin haksatna khen a om lawhcinnate delh huai zaw hi. Paulap hauluate sangin haksa ta leh aphu tantante lawhcing zaw uh hi. Gentehna pakin Zomite sungah Professor Dr. Thang Za Tuan bang Piada panin Deputy-General ciang atung ahi hi. Biakna lam a i siapite zong ana hanciam tantante mah na hi uh hi.
A kigen zel thu khat ah Abraham Lincoln suah ni khatin limsuai siamte in daipam sing inn khat leh kumpi inn khat suai uh a, ‘Tuni-in nang zong hih kumpi inn na tung thei hi. Ahi zongin sing inn pan kumpi inn tun nading kahleite na tot loh phamawh hi…’ cih lai kigelh hi ci hi. Tua ahih manin khuakhal sangkhak hun bei-in sang kong kihong ta ding ahih manin sangkah thei laite kah tantan ni. Nu le pate in zong hanciampih tantan ni. Nuntak haksa mah ta leh Zomite in pilna delhin sang kah tan tan ni. Haksatna khenah lawhcinna in hong ngak ahi hi.
