Rev. Thang Van Lian
A beisa 2010 – 2015 kikal gambup leh Chin State kumpi pen USDP + Galkap hi a, tua lai ah Tedim – Tonzang dinmun en le hang gambup leh State ah zong kumpi a sem ihi hi. State Hluttaw Speaker ei lam pan hi-in Minister of Planning and Finance leh Minister of Municipal Affairs, Electricity and Industry te ei lamte let vive hi. MP zong USDP teng mah a va kah uh ahi hi. Chin State budget khempeuh eima khut sung hi-in i deih mahmah mei vai tui vaite zong eima khut sung pan a kihawm a kisem ahi hi. Ahi zongin District vai, mei vai tui vai leh budget vai cihte lungdam huai tampi a om sam hangin gen tham ding i mualsuah zawh mel om lo hi, kici thei hi. Township zui a sumzekzia kilawm lo zah dongin vompi sahawmin kihawm ahih lam zong mipi in i phawk kha nai kei hi.
Kum 2015 ciangin gambup ah NLD in zo dikdek a, Tedim Tonzang ah bel ZCD + USDP in zo dikdek leuleu hi. Tulaitak Chin State kumpi en le hang NLD – 50%, Galkap – 25%, USDP – 16.67%, ZCD – 8.33% ahi hi. Minister zong Pu Pau Lun leh Pu Mang Hen Dal te i nei hi. Amau gel pen Chin State Cabinet ah kihel ding uh ahih manin Chin State sung asia apha amau gel theih loh in piang lo ding hi. Tua ahih manin a sia apha pen amau geel liangko mah ah kinga ahi hi. Hluttaw zong kimawl siam hi le hang ZCD pen NLD tawh alliance hi a, USDP pen Galkap tawh aki-unau uh ahih manin ZCD + USDP dinmun tawh Chin State sungah mai mawl nading om lo hi. I uliante, i MP te pen mipite tawh hong kinai mahmah uh hen la, mipite zong ei tang a i teelcin i MP te koi lam tung uh hiam, kin ngaihsut mahmah dih ni.
A beisa USDP kumpi hun leh NLD kumpi hun kum 10 sung i phutkhak thute en le hang Tedim – Tonzang te dinmun panin “lawmlawm aw, mahmah tazen, toto aw thapai aw…” ci-in thum nading leh phun nading vive thu hong kizom toto hi. Gambup a zo party tha pia hang a, hi ci ciang ihi khin hi. Minam party tawm khat tha i pia leuleu a, i dinmun pen kilamdang lua tuan lo hi. Tua leh bang kisam hi ding hiam? Bang hangin Khristian tam penna Chin State pen gambup State dangte tawh tehkakna in nekgukna – corruption a tam pen dinmun ah om thei hiam? Bang tan vei Chin State kumpi pen ama ut bangin kilawm kilawm lo khual zo nawn lo zah dongin gamta lai ding ahi hiam? Chin State a mi tam pente, kumpi nasem zong a tam pente in i ngaihsut ding khat om ding hi.
Biakna vai ah Chin State a sanggam dangte tawh kipawl sese loh hangin phamawh lo lel kha mah ding hi. Ahi zongin politics ah tua bang ziau lem thei lo hi. I zing vai khempeuh Hakha khuapi pan kivaihawmin Chin State kumpi in na khempeuh lenin sem ahih manin eimah in kumpi i sep ding kisam hi. A mi tam pente mah zong tuni dong a pil, a hau leh kumpi nasem a tam pen hi lai veve ding ihih manin Chin State eimah ngiat in hawl sawm dih ni. A key koi ah om ding hiam, ngaihsun dih ni. A mun kilawmte ah a lampi tawnin heh hun ding, heh zia ding, nuih hun ding, nuih zia dingte, kitom hun ding leh kitomzia dingte, phut hun ding leh nungkin hun dingte khinkhai siamin khangthakte mainawt dih ni.
