Rev. Vungh Suan Mung
THUPATNA
Leitung ah biakna nam lian 11 bang om hi ci-in kiciamteh a, Khristian biakna zong nam lianpi khat a hi hi. Mihingte’ pianzia a kan mipilte’n “biakna pen mi khempeuh kibat kimna, ki zakimna hi ci-in ciamteh uh hi. Leitung mun tuamtuam a om mipite’ omzia akan uhteh nuntakzia kilamdang tek ahih hangin biakna nam khatta kinei hi cih mukhia uh hi.
PULEPATE HUN
Pulepate khanghun, lawki biakna sung ah a ki om laitakin, kimlepam a om singkung lopate lak ah dawilekau om/teeng hi cih um uh ahih manin singkung lian pipite phuk ngamlo, su ngamlo, bangmah cih ngamlo uh hi. Tua hangin singkung lopate niim dildial a, guahtui maantak in kingah hi. Guahtui man ahih manin ankhing kikham hi.
KHRISTIAN BIAKNA LE KHANTOHNA
Zogam Zomite lak ah 1899/1910 hun a kipan lungdamna thu (gospel) hong tung a, kha thu a na um khin Zomite’n telnopsa in na umpah uh hi. Tu in Khristian suahzawh kum 100 val khinta a, i khangcinna kicing mahmah ta cih ding hi. Ahi zongin pulepate hun lai bangin, an khing kikham zo nawnlo tawh kibang hi. Vantung thu bek ultung sak in leitung nuntakzia thute nawlkhin kha hileng kilawm hi. Leitung ah lengla tat lo in, i innteek nading ahi hi.
Tuhun laitakin, Kawlgam sungah Khristian tam penna Zogam hi a, a khatna kingah hi. Tua mahbang in a zawng pen gam hihna ah a khatna mah kingah leuleu hi. Hi thu hangin i kisap khat om hi cih hong phawkskak hi.
Khristian biakna in hong hilh pen kha thu bek hilo, leitung thu mahmah ah zong khantoh ding (bukim khantoh ding) a hi hi. Lungdamna thu/ khanlawhna in hong khantohpih ding a thupi a hi hi. Gam khangtote lungdamna thu in khangto sak hi.
Mihing pumpi kilamzia tawh genteh leng, i khut ikhe te a kipan pumpi tung nate a hi dimdiam in a khantoh le a cidam mi hipan hi. Tua hilo a, khut langkhat, khe langkhat, bil langkhat, mit langkhat bek khangkhang henla, a dangte khanna om kei le a cidamlo mi suak hi.
I kiim ipam a om nuntakna nei le nutakna neilote khempeuh pen mihingte sang upa zaw ahih manin kem cing ni, puah ni, zuun ni.
THUKHUPNA
Khanlawhna le khantohna tonkhawm sak ni.Khanlawhna in ankhing hong khamsak tahen.
…………………………………………………………………
Rev. Vung Suan Mung, Sia Mungpi pen ZYA-Tedim Advisor khat hi a, ZYA leh Tedim Post pianna ding bek hi loin a khangcinna ding leh a nasepna khempeuh ah vai tampi tak hong dinpih leh hong hawmsak Siapa ahi hi. Siapa pen tulaitakin Tedim Baptist Convention ah General Secretary hi-in Covid-19 hong om ciangin Tedim Zatopi Vaikin Panpih Committee nasepna ICU Building project ah zong Secretary in pangin mipi adingin a hanciam mahmah Siapa ahi hi. A innkuanpih Siamah Cing Lam Ciin zong CMBC Pastor khat mah hi-in nupa in Pasian’ na a semkhawm etteh taak Pasian’ nasemte ahi uh hi. Pasian’ piak tate Lia Lun Khawm Huai (Philosophy 2nd yer Hr) leh Tg. Dal Sian Siam (Geology 2nd yer) te nei uh hi.
