November kha sung a kiman Niger Pyine a teng Catholic sangnaupang 100 te Nigeria Kumpi in honkhia ta cih thu Christian kipawhna khat in December 8 ni in pulak hi. Nigeria Kumpi te in hih thu tawh kisai mipite tungah a bul a baal in genkhia lo uh ahih manin hih sangnaupang za te pen kihona tungtawn in kikhek na tawh kikhahkhia hiam, sum tawh a tatkhiat uh hiam, ahih keileh sepdan dang tawh kihonkhia hiam cih kithei nailo hi.
Nu leh Pa pawlkhatte in a tate uh a kihonkhia lak ah a kihel mah uh hiam cih a kician in thei lo uh ahih manin lungkham mahmah lai uh ci hi. Naupang numei kum 11 mi, Magret’ Nu Yunusa Kabukaya in thu a genna ah sangnaupang 100 kihonkhia ding cih thu pen thuthak kipulakna ah bek mu kha ingh, ka tanu kihel ding maw kihel lo ding thei nuam ngeungau ingh ci hi. A tanu Magret pen Papiri khuano a om, St Mary’s Catholic School pan sangnaupang za 3 leh sang sia 12, November 21 ni a kiman te lakah kihel hi.
Naupang kiman pawlkhat pen kum guk khawng bek hi pan uh hi. Sangnaupang 100 te pen Dec 8 ni in Niger Pyine’ khuapi Minna ah tung ding in kilamen a, tua khit ciang in pawlpi makaite leh sang makaite kiang ki-ap ding uh hi.
Congressman Riley Moore in hih sangnaupang te kihotkhiatna tawh kizui in Africa gam nitumna lam ah nakpi tak in humbitna kinei ding a, Nigeria leh US te’n mapang khawm in galkap kipawlna tuam (task force) kiphuan ding ci lai hi.
Source: Reuter
