Kal khat sunga National leh International thuthangte genkikna
Hello! Dam maw Zomi! Tedim Post pan hong muakkik ung. Tuni No kha ni 26 (Nilaini) November 26, 2025 kal khat sung National leh International thuthangte pawlkhat genkikna hong nei ning.
A kihel ding thulute in –
➤ KITEELPI VAI NAWNGKAISAK CIH THU TAWH A KIMAN MI 100 KIIM PHA
➤ SANGKAH DING SANGNAUPANGTE MEE MAKHIATNALAI KISAM DING CIH THU UEC IN GEN LO
➤ KK PARK AH ONLINE PAN MIKHEM NASEMTE (KYARPHIANT) OM LAI
➤ AMERICA TE SCAM CENTER STRIKE FORCE TUNGAH SAC IN MUANMAWHNA NEI
➤ GRADE 5, GRADE 9 LEH GRADE 11 TE KUMPI LAIVUAN OMKIK DING
➤ MANDALAY AH KEELKHAWINA HUANG A KATNA HANG IN INN GIAT KANGTUM
……………………………………
➤ KITEELPI VAI NAWNGKAISAK CIH THU TAWH A KIMAN MI 100 KIIM PHA
Tulaitak SAC te makaihna tawh a kibawl ding ahi kiteelpi nawngkaisak cih thulu tawh a kiman mimal 100 kiim pha ta hi cih reporter te suahsakna tungtawn in kithei hi.
Hih kiteelpi ah a kihelding ahi Party tuamtuam te a ki nawngkaisak theihloh na dingin vaipuak late in August kipat pan in a mat tohtoh uh ahi hi.
Hih kiteelpi tawh kisai gamtatna tawh ahi a kampau na tawh a hi zongin nawngkaisakna khat peuhpeuh a bawl akua mapeuh thu kinei ding hi cih Central Committee Chairman, Union Minister for Home Affairs, Lieutenant General Tun Tun Naung in pulakna nei hi.
Bago region, Ottwin township ah kiteelpi tawh kisai vaipuak a la zumnasem huh khat avua te zong November 18 in zum kitun hi. Bago Region, Shwekyin township ah zong kiteelpi ah vaipuak ala ahi Daw Ama Seih tem tawh a dawtpa zong November 14 in kiman hi cih zong pulak beh hi.
Kiteelpi a nawngkai sakte sihdan zong kipia thei hi cih July kha a pulakkhiat ni uh pan October 29 dong thukhun (Article 40) tungtawn in pasal 83 leh numei 5 a kigawm 88 kiman hi cih Minister of Home Affairs in October 31 in Naypyitaw ah a kibawl thukikupna ah pulakna nei hi.
……………………………………
➤ SANGKAH DING SANGNAUPANGTE MEE MAKHIATNALAI KISAM DING CIH THU UEC IN GEN LO
Tukiimnai tengin University leh College sangnaupang te-in mee a makhiatna laite uh a sangtek vuah kisam ding ci-in thu ging tuamtuam a omna tungtawn in UEC in tuatawh kisai pulakna bangmah omlo cih dawnkikna nei uh hi.
Yangon a teng (innkuanlai) nei khat in Ayeyarwaddy, Maopin (မအူပင်) Technology University ah sang a kah nop leh mee makhiatnalai lak in sang ki-ap thei bek ding hi ci-in sang pawlkhat genna a za pawlkhat in UEC tungah a dotna uh zong om hi.
Mon state sung aom University khat ah zong sangnaupangte in Nov 17 – 21 kikal mee a khiat khit uh ciang a mee piaknalai uh sang ah apkik ding cih sang lampan a pulakna uh zong om hi.
Tua tawh kisai Yangon University sangnaupang khat in “Ki zawhthawh vai lua leh ei thukimna omlo in hidan thu pen a nungah thunei khat om hi ding hi” cih pulak hi.
Ahi zongin UEC member khat in hih thute tawh kisai UEC in bangmah laisuahna omlo-in a man lo thu hi ci-in zong gen hi. Kiteelpi masa Dec 28 ah sangnaupangte sangkah ding uh ahih manin Nov 17- 21 kikal mee makhiat thei ding uh hi cih UEC in Nov 10 in tangko khin hi.
……………………………………
➤ KK PARK AH ONLINE PAN MIKHEM NASEMTE (KYARPHIANT) OM LAI
Online tung pan mi akhem (Kyarphiant) te bei siangsak ding ci-in SAC leh Kayin gamgi kem thautawi kipawlna (BGF) te pangkhawm in KK Park sung a om innlelo tampite nisim susia uh himahleh November 19 dong tua sung a nasem gamdang mite omlai hi cih gamgi a om thupuakte’n pulak khia uh hi.
KK Park pan a taikhia gamdangmi 30 valte Nov 19 in Taungyin gunpiau (သောင်းရင်းမြစ်ကမ်း) a om vaimim lote kantan in Thai gam lam a manawh uh mipiten mu uh hi. Tua a taikhiate Thai palikte in gamsung vilin a vak laitak un man kha uh a, mimal 39 pha in pasal 34 leh numei 5 ahi hi.
Gamgi a om thupuakte genna ah November 18 nitak lamin nidang sang a nasia zaw in bomb puahkhapna leh a ging tuamtaum kiza in lei thuum liang ahih manin a sunga omlaite a taikhia hiding uh hi ci-in gen uh hi.
AA park pen Kayin State, Myawaddy township pan tai 7 a gamlatna, Maytawthalay (မယ်ထော်သလေးရွာ) leh Inngyinmyaing khua (အင်ကြင်းမြိုင်ရွာ) kikal ah acre 500 kiim a zai huangpi khat hi a, Sen te makaihna tawh AA1 – AA6 kici zone guk a om ahi hi. SAC in Oct 22 pan kipan in site 2 leh site 3 a om innpite nisim phialin a susia toto hi a, General Min Aung Hlaing in zong a beidongin kisem ding cih pulak khia hi.
Hih tawh kisai BGF tawh kinai thupuak khat in site 3 sung a om innpite pen SAC in a thahte uh teci a beisak nading bek in a hahsiang hi a, a dangte bang mah cilo-in a sung a nasem gamdang mite zong pusuak lo uh ci hi.
KK Park sunga nasem gamdang mite naleng hemkhia gai zo lo-in, a taikhia cih khawng omlai ahih manin SAC in muibun takin sem gai zolo cih kilang mahmah ci-in mipiten gen hi.
……………………………………
➤ AMERICA TE SCAM CENTER STRIKE FORCE TUNGAH SAC IN MUANMAWHNA NEI
America in Scam Center Strike Force a kici online tungpan mikhemte beisiang sak ding nasepna ah selsimthu om ding hi ci-in SAC thugenkhuan anei General Zaw Min Tun in pulak khia hi.
American in Myanmar, Laos, Cambodia leh Southeast Asia gam teng ah online tung pan mikhemte leh a nungah thuneite khempeuh kankhia in thubawl ding cih ngimna tawh SCSF a phuan khia hi ci-in Nov 12 in tangko uh hi.
Hih SCSF ah America pan Attorney General’s Office, Federal Bureau of Investigation (FBI), Secret Service, leh Department of Justice, Criminal Division te-in vaipuak la uh hi.
……………………………………
➤ GRADE 5, GRADE 9 LEH GRADE 11 TE KUMPI LAIVUAN OMKIK DING
Grade 5, Grade 9 leh Grade 11 te a vekpi in aung gai hi nawn lo in kumpi laivuan i cih a aung a kia omkik tading hi cih pilnalam vaisaite in pulakna nei uh hi.
Bang hun pan hih thukhun kipan ding cih pen Ministry of Education in kiciantak in pulak lian nailo hi.
Hih bangin a kigeelna pen lai thei takpi leh lai hanciam takpite bek aung ding a, a kia te in zong hong hanciam zaw ding uh hi. Tua banah hih thukhun pen sangnaupangte’ nulepate leh sya/syamah te’n zong thukimpih uh hi cih zong pulakna nei uh hi.
…………………………………
➤ MANDALAY AH KEELKHAWINA HUANG A KATNA HANG IN INN GIAT KANGTUM
Mandalay khuapi, Amarapura township, Bon Oo khua ah Nov 18 zingsangtuung 2:05 am kiim in keelkhawina huang a katna huhau in inn giat kang hi.
Keel te thothakloh nading meivak na pan kipan hiding in ki ummawh a, zingsang 3:02 am kiim in meiphelh zo uh hi.
Hih meikatna hangin a liam a bai kuamah om lo a, keel li si hi. Hih meikatna thupai zia tawh kisai zum ah thu ka bawl laitak uh hi cih meiphelhzum pan vaipuakneite in pulakna nei uh hi.
……………………………………
Source: The Irrawaddy – Burmese Edition / BBC Burmese/ Voice of Myanmar
