By Rev. Thang Van Lian (July 26, 2020)
Na lianpi a sem nuam lo kuamah om lo ding hi. Zogam zuun ni, Zogam in nang hong ngak hi, Zogam ni bang taang ding… cih khawng i zak mun mahmah thu khat leh i lungsim a om den thu ahi hi. Ahi zongin bangci bangin Zogam zuun ding, koi pan kipan a bang lampi teng tawh semkhia thei ding, cih a tak a sep khiatzia ding lam pen gen siam ding haksa mahmah a, ngaihsutpi dingin zong nei khol kei mai leng kilawm hi.
Thakhat thu in Zogam hong kikhel vat hen la, Aizawl khawng, Singapore khawng tawh kibang thei hi leh a kibangsak nuam vive ihi kha ding hi. Ahi zongin leitungah na limlim thakhat thu in kikhel vat, khangto vat, sun kal zan kal kilumlet vat… cih dan om ngeilo hi. Hun sawt khop khat kisam a, a sem a bawl kikhelna a piangsak mi a om ding kisam hi. Tedim ah mi tampi teeng hen, i cih leh mite teen nop mahmahna khuapi ahih theihna dingin Tedim khuapi i bawl masak kul hi. Tua pen mi khat bek in a sep zawh ding hi lo a kumpite, Pawlpite, hausate, ZYA te leh mipi khempeuh in vaipuak i nei hi.
Rome khua pen nikhat thu a kilam hi lo hi (Rome was not built in a day), cih paunak om hi. Khuapi khat, gam khat a thupi, anuam leh a minthang dinmun atunna ding pen hun sawtpi kisam a, hun sawt pong bek tawh zong a piang hi loin a pianna dingin a sem mi kisam hi. Mihingte pen na lianpi a sem nuam vive ihi hi. Ahi zongin na lianpi a pianna dingin na a neuneute pan kipan ahih lam i phawk gige ding leh thuneute ah citak a, neu lua ci-in nasep ding zumpih het lo a sep dingte sep ngam ding kisam mahmah hi. Tunailo khekhuang, cih danin thuneuneute ah cihtak ding kinngaihsut loin Zogam puah ni, Zogam zuun ni, cih bang kampi bek tawh i thapaih khak leh Zogam gen loh eima nuntakna mahmah zong zuun loh puah loh hong suahkhak ding ngaihsut huai mahmah hi.
Nasep limlim a zum huai khat beek om lo hi, cih phawk ding kisam hi. Nintawm nasep khawng neu ngaihsut het loin nintawm masa i kituh ding kisam hi. Nintawm vengte, nintop ding a kin ngaihsut den khuapi leh minam ihih ciangin i sunmang ahi Zogam zuun nasep pen i theih loh kalin tampi a sem zo khin i suak ding hi. Tai tampi tun zawhna dingin kalkhat tawh kipat kul hi, cih paunak om mah bangin Zomite tai tampi i tun zawhna dingin tuni kal khat tawh kipat ding zum het kei ni.
Lai Siangtho sungah makai lian a suak nuamte in nungzui sem phot hen, cih hong gen hi. (Mat 20:26-27; 25:21-23). Tuni i khuahun pen makaite’ sep ding bang thei sim zawzen in eima mun ciat ah thuneu tawh a kibang i sep ding tampitak a omte i phawk nawn kei thei zel hi. Thusia khempeuh MP te leh kumpite i ngawh ziau lel a, eima munah ei tawh kituak sep huaite leh sep loh phamawh thute nangawn ngaihsutin i ngei nawn kei thei hi. I makaite in amau munah a hanciam ding uh a omte i kuppih ding zong himah hi. Ahi zongin eimah ciat i sep ding thute zong i kinngaihsut kei mawk leh Zogam bel pallun pak nai lo ding hi.
Nungzui sem nuam lo a makai bek sem nuam, cih pen Lai Siangtho deihna tawh kilehbulh linlian hi. Zogam pallun hen, i cih takpi leh thuneute sep ding zum ngaihsut nawn kei ni. A kulna munte ah nintawm ngam ni. A kulna munte ah inn phiat ngam ni. A kisap leh kuang sawp ngam ni. Suangneu a i pan khak leh suangpi kipna dingin a thekin cihtakna tawh pang kenkan ni. Suangpi munah i om khak leh zong Suangpi suangneu in thek, cihte mangngilh loin eima mun tek ah i sep ding nasepte leh i lak ding vaipuakte neu e lian e, ci loin sem ngam ni.
