Tun kha 28, 2026 ❖ THE TEDIM POST
World Day of Social Communications a 60 veina bawlna ding ah, Pope Leo XIV in laikhakna nei khol hi. AI pen mihingte a huh ding hi a,mihingte’ zahtakna a la ding hilo hi ci’n AI tawh kisai a muhdan pulakna laikhak sung ah gelh hi.Hih laikhak pen Zing kha 17,2026 ( May 17, 2026 ) ciang genkhiatna a kinei ding ahi hi.
Mihingte pen Pasian’ limlemel sun a kibawl i hih lam leh a mah tawh kizopna pen a thute tungtawn bek a hihlam gen pha hi. I melte a kipan i awte a hi zong in i kepcingna pen Pasian i sutnate a kemcing ihi a, i nuntak sung i nasep ding a sem i hipah hi ci’n genna nei hi.
Pope in a lauthawngthu khat a hih leh AI tawh mihing a hilo, mihingte’ limlemel leh aw bang lian nei a kibawl theihna pen mihing khatlekhat i kizopnate nakpitak in susia ding in ummawh hi. Hih buaina laigil pen setvante’ hang hi lo zaw in ei mihingte’ hihna leh i kizopnate ultung sak zawk nopna lungsim neihna hizaw hi ci hi.
Social media tungah lim khat et khit ciang a manlang thei pen a mel dang bawl ding cihte pawlin i thu ngaihsutziate leh ih thungaih thuzak (listen) dante siasak in mihingte i ngaihsut dan hong kibang sak gai hi ci lai hi.
Pope in AI tunga kingakna lungsim in mihingte mawhpuakna hong telsak lo in, i lungsim gelnate susia a, i thuvaihawm dante nawngkaisak hi ci hi. Hih lungsimte i puaksuak a leh i mihing nuntakna banah milak a i nuntak dante hong sukha toto lai ding hi ci hi.
Mihingte taangmi ding in mihingte mah mapang in i kizop theihna letsong pen mangsak kei ni ci’n a thugenna khup hi.
Source: Vatican News
