Tun kha 3, 2026 ❖ THE TEDIM POST
Elon Musk in Russia te’n Starlink satellite zanga drone tawh gal a do theih nading uh lampi a khaktanna hangin “gah taktak suak” ci-in Ukraine gam-uk ulian khat in gen hi.
SpaceX phuankhiapa pen suahtakna a gumpa leh Ukraine mite’ lawm taktak hi ci-in Defence Minister Mykhailo Fedorov in phat hi. Russia te’n Starlink zangin drone tawh gal a do lam a theih ciangin Elon Musk in manlangtakin hanciam pah hi, ci-in gen hi. Tua drone te pen Russia in Ukraine a dona dingin a zat hi a, meileng tunga tuang khualzin mi 6 te sihna vai ah zong kipaikanna om hi cih pulakkhia hi.
Musk in X tungah, “Russia in phalna om lo-a Starlink a zatna uh khaktan nading i hanciamna a gah suak ahi hi. Mailam ah sepbeh ding a om leh zong hong theisak un,” ci-in gelh hi.
Fedorov leh Musk in bangci danin khaktan cih a genkhiat loh hangin, Defence Ministry website ArmiyaInform in a genkhiatna ah, SpaceX in Ukraine tungah a leng Starlink terminal te a hatna (speed limit) 75kph ciang bekin a tai thei dingin khaktan hi, ci hi.
A beisa Pizingni in Fedorov in a genna ah, Ukraine kumpi in Ukraine gamsunga zat theih ding Starlink terminal min ciaptehna (white list) bawl ding a, a kiciamteh lo khempeuh kizopna (connection) kikhaksak ding hi, ci hi. Hih vai pen SpaceX tawh kithutuak in a kisem ahihlam zong genbeh hi.
2022 Tun kha (February) in Russia in Ukraine a sim cil a kipan Starlink pen Ukraine gamsung ah a kizangh ahi hi. Musk leh Ukarine kikal kitelkhialh hun pawlkhat a om hangin, Fedorov in Starlink pen Ukraine gam a dinzawh nadingin a thupipen khat ahihlam genkik hi.
Source: BBC News
