Tun kha 1, 2026 ❖ THE TEDIM POST
Iran gam makai lianpen Ayatollah Ali Khamenei in US te’n galkap a behlap toto uh leh gam khat leh khat kidona piang ding hi ci-in, Tasnim News Agency tungtawnin pulakkhia hi.
US President Donald Trump in Iran tawh thuthuk kikupna kinei-a, thukimna khat piang ding hi ci-in lametna nei hi. Iran gam Security Council Secretary Ali Larijani in zong kikupna ding lampi kigeel hi ci hi. Ahi zongin Trump in Iran ii nuclear vai leh kumpi langpang luphonate a netniamna dingin galkap tha zat ding pulakkhia ngei hi.
US in galkap tha a behlapna-in USS Abraham Lincoln minnei vanleng pua tembawpi Iran gam ah sawl a, tulaitak Arabian tuipi tungah a om lam US Central Command in gen hi. Hih tawh kisai Khamenei in, “Trump in tembawpi ka paipih ci-in gen den a, ahi zongin Iran minamte in tua bangte kikihta lo hi,” ci-in genbeh hi.
Iran in hong tung ding Nipini ciangin Strait of Hormuz ah ni nih sung meithal taktak tawh gal kisinna (naval exercise) neih ding pulakkhin hi. Hih tui lampi pen leitung sathau kipuakna lampi thupipen hi a, leitung sathau kizuak zah ii seh nga-ah-khat hih lampi tawnin a kipua ahi hi. Iran in a gal kisimna a pian zenzen leh hih lampi khak ding ci-in zong vauna nei hi.
US in tua mun-ah om Iran galkapte kiang ah, a lauhuai leh a kilawmlo-in a gamtat loh nading uh vaikhak hi. Hih tawh kisai Iran Foreign Minister Abbas Araghchi in, “US galkapte in ko’ gam leitang sungah bangci bangin gal kisin ding cih hong thupiak sawm uh hi,” ci-in dawngkik hi.
Tua banah a beisa Ninoni in Iran gamsung Bandar Abbas leh Ahvaz khuate ah gas puahkhapna hangin a si a liam zong om hi. Trump in Laizingni in, “Nuclear bawl kei unla, lungphote thahna khawl un,” ci-in Iran vaikhak hi. Human Rights Activists News Agency in Kau kha (December) pan kipan buaina sungah mi 6,300 val kithat ci a, Norway pan Iran Human Rights kipawlnate in a sisa 25,000 val thei ding ci-in gen hi.
Source: BBC
