Leitung bup kham man a khan mah bangin, Myanmar gamsung kham man zong 16 pe (a tak) tikal khat a pualam ah Tein 106 MMK tung to hi cih thu Yangon, Shwe Bontha lampi tunga khamzuakte genna tungtawnin kithei khia hi.
Tuni Theinosih kha 26 nitak lamin leitung bup kham man ounce khat ciangin 5,091 USD tung a, Myanmar kham man zong tikal khat Tein 106 MMK ciang tungin a sangpen ciaptehna ngah hi.
“Kham man khanglua ahih manin a lei ding tawm mahmah a, a man a khan manin a zuakkik tamzaw hi,” ci-in Yangon, Shwe Bontha lampi-a kham zuak khat in gen hi.
A beisa kha 6 sungin kham man pen Tein 80 MMK kiim hi a, tukum bul lamin leitung bup ah kham man a khan manin Theinosih kha 20 nungin Myanmar gam ah Tein 100 MMK val to hi. Yangon Region Gold Entrepreneurs Association (YGEA) te’ ciaptehna ah bel, kham man (official rate) pen tikal khat Tein 60 MMK bek hi lai hi.
Leitung bup kham man a khanna a hang pen U.S President Trump hangin sumlepai vai buaina, US dollar man kiatna, bank interest rate khiapna leh gal vai buainate hang hi ci-in kigen hi.
Myanmar gam ah sum man khang zel, kiam zel cih bangin om ahih manin mipite in kham leh innlelo lei-in sum khol uh hi. Tua hangin kham man a khangto hi ci-in sumlepai lamah a siamte in gen uh hi.
Source: BBC Burmese
