US gam in Venezuela kumpipa Nicolas Maduro a mat lam uh a pulak khit uh teh, Israel-te’ gam makai (politician) khat ahi Yair Lapid in, “Iran gam a ukna buluhte in Venezuela gam ah bang thu piang hiam cih hoihtakin kan uh hen,” ci-in Iran khuapi Tehran a om gam makaite vauna nei hi.
Maduro a kimatna thu pen US Kumpipa Donald Trump leh Israel Prime Minister-pa Benjamin Netanyahu a kimuh zawh uh kal khat khit cianga a thupiang ahi hi.
Washington leh Caracas, Venezuela-te’ khuapi kizopna leh Washington leh Tehran kizopnate a kibatloh hang, Trump in Venezuela kumpipa Maduro tungah a bawl bangin Iran gam makaite tungah zong bawlkha thei ding hi cih thukante’n a ngaihsutna uh pulakkhia hi.
US gam a thuneite in Maduro pen khamtheih-guihtheih tawh kisai kipawlna khat pen makaih hi ci uh a, Trump leh a pawlte in zong Washington in Venezuela-te’ datsi khempeuh tungah thuneih ding deih uh hi.
US gambup Secretary Marco Rubio in zong Maduro pen Iran tawh kizopna kiptak nei hi cih gen phapha a, ettelna omlo pi-in Caracas in Lebanon gam a thautawi kipawlna Hezbollah-te panpih hi cih cibeh lai hi.
Maduro in Iran tawh a kizopna uh pen a thukzaw leh a kicianzaw a kizop ding a gel laitak hi-in, tun amah a kimat khit teh Iran gam in kizoppih kician nei nawnlo phial ding hi.
Iran kumpite in pen US te’n Venezuela tungah a gamtatnate uh tawh kisai lungkimlohna lakkhia pah uh a, United Nations zong kihel dingin ngen uh hi.
January 3 ni-in, US gambup Secretary Rubio in Maduro kimatna thu pen Trump hunsung a US a langpan gam khempeuhte’ adingin laikhak khat hi ci hi.
Source: Aljazeera
