Tun kha 6, 2026 ❖ THE TEDIM POST
Chin State leh Sagaing Region sungah 2021 Tang kha pan 2025 Tang kha ciang, zawhthawh thu tawh numei luppihna (sexual violence) a thuak mi 277 valte tungah huhna kipia thei a, tua lakah gal leh sa kikal buaina sung ah a thuak numei 16 om hi. Hih vai tawh kisai a kician zaw in kikan lai himah leh hih gal buaina sung ah thuman kan khiat pen haksatna lianpi om hi ci-in Women for Justice (WJ) in Tun kha 6, 2026 ni-in thusuahna nei hi.
2021 kum ukna kibuluah khit a kipan Chin State leh Sagaing Region sungah gal leh sa kikal zawhthawh thu in numeite luppihna pen nakpi-in khangto a, a dahhuai mahmah dinmun hi ci-in WJ thusuahna ah kihel hi.
2024 Theinosih kha kiim pawlin Chin State, Mindat khua a om Galkap Tatyin 274 te in kum 22 a pha Chin nungak khat kipawlin buan (gang rape) uh hi. Tua hangin tua nungaknu in naupaai a, a nu in a tanu tuahsiatna hangin a lungsim na-in lungtang natna tawh si hi. Tua nungaknu pen WJ kipawlna in lungsim lam khamuan’na leh nau neih nadingin huhna pia uh hi.
Mindat khua a om tua nungaknu “Kei mimal in ka lungkim lo hi. Hih bang a gamtate in a tatna tawh kituak thukhenna a thuak ding uh ka lunggulh hi. Himah leh, tu laitak thuman thutak ngah ding haksa mahmah ahih manin, ni khat ni ciangin thumaan thutak om ding hi ci-in lametna ka nei hi,” ci-in gen hi.
Women for Justice (WJ) pen Sagaing Region leh Chin State sungah a diakin a kalsuan kipawlna hi a, numeite’ bitna, nulepa kikimna, thumaan thutak, daihna leh Federal Democracy ngah nadingin a hanciam kipawlna khat ahi hi.
Source: Women for Justice (WJ)
