Tun kha 4, 2026 ❖ THE TEDIM POST
Russia leh Myanmar gamte in kum 5 sung galkap lam kipawl nading thukimna khat bawl uh a, hih pen galkap kumpi thahat nadingin a thupi mahmah kithukimna hi, ci-in Pithaini in kumpi thuthangte in pulak uh hi.
2021 kum a kipan Myanmar galkapte in ukna buluah uh ahih manin gamsung gal hong kipan khia ahi hi. Tua hun a kipan galkap kumpi in galkap tha a hat semsem nadingin Russia leh China gamte’ panpihna tungah kinga uh hi.
Pizingni in Russian Security Council Secretary asem Sergei Shoigu pen Myanmar gam ah hawh a, galkap kithukimna thak Russia Defense Ministry in pulak hi ci-in Russia te thuthang tangkona khat ahi TASS media in gen hi. Hih kithukimna pen 2030 kum ciang kizang ding cih zong pulakkhia uh hi.
Shoigu in, “Russia in Myanmar gam a kip a kho nading leh gam a bit nadingin Myanmar gam makaite’ hanciamna nakpi-in thukimpih hi,” ci-in galkap uliante’ kiangah gen hi. Tua banah, “leitung bup vai-a kipan Moscow ii panpihna a kicingin na ngah ding uh hi,” ci-in genbeh hi.
Myanmar kumpi lam thuthangte in “galkap pangkhopna khangsak ding” cih thulu tawh hih kithukimna bawl uh a, ahih hangin a thu akician in pulak lo uh hi.
Myanmar galkap kumpi in kha khat sung kiteelna bawl khin a, kum nga sung galkap ukna leh gam sung buaina khit ciangin democracy leh kilemna lampi zuihkikna hi ci-in gen uh hi. Ahih hangin mipi’ galkapte’ ukna munte ah kiteelna kikhak a, 2020 kiteelna-a gualzo Daw Aung San Suu Kyi leh apawlte kihelsak lo uh ahih manin gamdangte in thukim lo uh hi.
Source: TASS/State Media
