Hong tung ding Dota kha (March) sungin Hluttaw samin, kiteelna a zo party tungah Myanmar gam vaipuak ki-ap ding hi ci-in SAC makai Min Aung Hlaing in Shan Gam sung khualzinna mun khat ah gen hi.
Hih thu pen Theinosih kha 20 in Nisuahna Laizang Galkap Phualpi (Eastern Central Command) ah galkap innkuante tawh a kimuhna pan a gen ahi hi. Tua banah 2025 Kau kha (December) 21 in Pyaymyo a om Southern Command leh Kau kha 20 in Magway a om Central Command te ah galkap innkuante tawh a kimuh laitakun zong hih thu mah na gen ngei hi.
SAC thugen khuan a nei General Zaw Min Tun in zong, hong tung ding Dota kha sungin Hluttaw kisam ding a, Dopi kha (April) sungin teelcing party-te in vaipuak la ta ding hi ci-in Theinosih kha 11 in na gen hi.
Tu laitakin SAC makai Min Aung Hlaing in hunbit kumpi (interim government) leh Galkap Mangpi (Chief of Defence Force) vaipuak a lak laitak ahi hi. SAC thugen khuan a nei Zaw Min Tun in, Myanmar gam kumpi dingin Min Aung Hlaing a kiteel leh zong semto suak ding hi ci-in 2025 Kau kha 14 in na gen ngei hi.
Source: BBC Burmese
