Tun kha 2, 2026 ❖ THE TEDIM POST
Sagaing Region, Kalaymyo-a om Mawlaik thong sungah galkapte’n ukna a buluah zawh uh kum 5 cinni, February 1, 2026 ni-in gamvai tawh thongkiate’ lungphona hangin mimal 15 thongkhan tuam (solitary confinement) ah kipuak uh hi ci-in Kalaymyo Mass Strike Leading Committee te tungtawnin kiza hi.
Thongkhan tuam-a a kipuakte pen gamvai tawh thongkia numei vive hi uh a, a thu a kicianin a kikantel laitak ahi hi. Hih lungphona pen Mawlaik thong sunga om Phaung Pyin (ဖောင်းပြင်) khuami Ma Khin Nwet Hlaing in a makaih ahi hi.
Mawlaik thong sunga om numei thongkia 200 kiim in “Thway Thitsar” la sa-in awngkhawm uh a, thu nam 3 ngetna zong nei uh hi ci-in General Strike Coordination Body (GSCB) in taangko hi. A nget uh thute pen thubuai lian 9 te phiat ding, thongkiate’n a kikimin hamphatna a ngah nading, leh ukna za nei khempeuh a maiming nading cihte ahi hi.
Hih ngetna sungah a kihel Nambat 1 leh 2 pen Myanmar kumthak ni 1 ni a nunung penin thukimna piak dingin ngen uh a, tua hun ciangtan sungin a tangtungsak kei uh leh Myanmar kumthak ni 2 ni pen Myanmar gambup thong sung lungkimlohna pulakna (strike) ni-in kiciamteh ding hi ci-in GSCB in pulakkhia hi.
Tua banah GSCB in leitungbup kumpite leh kipawlnate tungah Myanmar gam thong sunga om gamvai tawh thongkiate’ adingin panpihna piak nading, nuntak lungmuanna ngah nading, kibawlsiatna bei nading leh a manlangin suahtakna ngah nadingin a kisam bangin panpihnate a piak nadingun hanthotna nei uh hi.
Hih vaiteng tawh kisai-in thongsung thuneite leh galkap kumpite lam panin tuni zingsang dong bangmah genkhiatna om nailo hi.
Source: Kalaymyo Mass Strike Leading Committee / General Strike Coordination Body – GSCB
