Tun kha 8, 2026 ❖ THE TEDIM POST
Chin State, Falam khuapi lam manawhin a pai ahi SAC galkapte leh CC te kha 4 val kidona ah SAC galkap lam pan ulian 9 kihel mi 200 val si a, galvan tampi zong kiman hi, ci-in Chinland Council nuai-a om ahi Chinland Government Ministry of Defense in Tun kha 8,2026 ni-in pulak uh hi.
SAC galkapte in Kalay-Falam kizopna a lak zawh nadingun, Div 77 nuai-a om galkap pawl 9 gawmkhawmin, galkap tul a sim zangin Falam lam manawhin kha 4 val sung hong kuan uh hi. A beisa kha 2 sungin nikhat zong khawl lo-in kidona nasia mahmah a, SACgalkapte in vanleng (Fighter Jet) leh Y-12 te zangin 50 vei val kap uh a, bomb tul a sim khia uh hi. Tua banah drone zong nakpi-in zang uh hi.
Ahi zongin Chinland Government galkapte in nang uh a,SAC galkapte 200 val thatin, galvan leh drone pawlkhat a ngah banah galmat (POW) pawlkhat zong nei uh hi. Tu laitakin Chinland Government galkap Column 2, 3 leh 4 te in SAC galkapte tawh kido zom suak uh hi. SAC galkapte in lei lam leh van lam tha zang in a do hangun, amau lam pan a si a liam tam ahih manin galkap tha behlap den uh hi.
Falam lam a pai SAC galkapte pen Chinland Council (CC) leh Chin Brotherhood (CB) kipawlin na do uh a, a beisa Tun kha 3 ni kidona ah SAC galkapte lam pan Major 1 leh mi 34 si uh hi.
Source: Chin World
