Dota kha 1, 2026 ❖ THE TEDIM POST
Israel tawh kopin Iran a simna uhah US galkap thum si-in, mimal nga in liamna nakpi thuak uh hi ci-in US Central Command in Dota kha 1, 2026 (March 1, 2026) zingsanglam in pulak hi.
Hih gal sungah US galkap a si a om masakna ahi hi. Tua banah galkap dang pawlkhat in zong bomb them leh thau tang lengte’ hangin liamna nei uh a, a lu uh zong sukha (concussion) hi.
Hih gal sungah Iran gam makai lianpen ahi Ayatollah Ali Khamenei a sih khit, Ninoni in zong Middle East gam sungah kikapna nasia takin kizom to hi. Israel in “Tehran khuapi laizang” taktak nawk a, Iran in zong Israel leh Persian Gulf sung nawk kik hi. Iran in a kapna hangin Jerusalem ah a tawmpen mimal kua si-in, mimal 28 in liamna thuak uh hi ci’n Israel national emergency service te’ in pulak uh hi.
1989 kum a kipan Israel leh West gamte a langpang den ahi Iran makai lianpen Khamenei pen Tun kha 28, 2026 ( February 28, 2026)a kikapna ah Iran makai dangte tawh kigawmin si hi. Iran gamsung ah a dah a kap zong om a, a lungdam zong om uh hi. Iran kumpi in ni 40 sung dahna hun (mourning) dingin tangko a, gam makai ding a hunlapin ( temporary leadership structure) guatna nei hi. Iran makaite a simna uhah galkap mang 40 bang si sak uh a, Iran galkap phualte susia to suak ding uh hi, ci in Israel galkap uliante in Dota kha 1, 2026 ( March 1, 2026 ) in pulak uh hi. US leh Iran kikal nuclear vai a kikum sak den Oman gam zong a khatveina dingin kapkha hi ci’n Iran in genkikna nei hi.
Source: The Washington Post
