Tun kha 5, 2026 ❖ THE TEDIM POST
US in China te’n leisung vanmanphate (critical minerals) tungah a thuneihna uh a khaktan zawh nadingun, smartphone pan galvan dong bawl nadinga kisam leisung vanmanphate kilei kizuakna phual (trade zone) bawl ding hanciam uh hi, cih tangkokhia uh hi.
Nilaini in State Department makaihna tawh Critical Minerals Ministerial kimuhkhopna nei uh a, tua lai-ah UK, European Union, Japan, India, South Korea, Australia leh Democratic Republic of Congo gamte kihel uh hi. Palai paikhawmte in computer chip leh electric motor battery bawl nadinga a thupi mahmah leisung vanmanphate ngah theih nading leh zat theih nading thu kikum uh hi. Tuni ciangdong hih vanmanphate tawhkhiatna leh bawlna ah China in thuneihna lianpi a neih laitak ahi hi.
US Kumpi thusuahna tawh kizui-in Vice President JD Vance leh Secretary of State Marco Rubio in China min a lawh loh hangin, gamdang pan vanmanphate hong lut ziahziah ahih manin gamdangte’ adingin sumzon haksasak hi, ci-in Vance in gen hi. Hih bangin vanmanphate man a kiamsuk luat loh nadingin siah (tariffs) khon ding vai zong geelna om hi, cih pulak uh hi.
President Donald Trump’ a huh David Copley in zong leisung vanmanpha tawhkhiatna lam ah sum dollar billion a za a sim (hundreds of billions) zat sawm uh ahihlam gen hi. MP Materials leh Lithium Americas cihte ah sum kisung khin hi, ci hi. US Trade Representative Jamieson Greer in zong US, Japan leh European Commission te in sumbawlna thukhun leh kalsuanzia kibang (coordinated trade policies) bawlkhawm ding uh hi, ci hi.
Kimuhkhopna ma-in China Foreign Ministry thugenpa in gam tuamtuamte in sumbawlna thukhunte zuih ding leh kithuzakna khangsak ding kisam hi, ci-in gen hi. A beisa Pizingni in zong President Trump in “Project Vault” kici, dollar 12 billion (pound 8.8bn) man ding vanmanpha kholna (reserve) bawl ding geelna a neihlam tangkokhia hi.
Hih kimuhkhopna pen Trump leh China President Xi Jinping phone tawh a kiho ni mahin a neih uh ahi hi. A beisa Phal kha (October) sungin China in leisung vanmanphate (rare earths) a hawmkhiatna (export) khauhsak semsem ahih manin US-te nasepna tampi sukha hi.
Source: BBC
