Hello! Dam maw Zomi! Tedim Post pan hong muakkik ung. Tuni Kau kha ni 3 (Nilaini) December 3, 2025 kal khat sung National thuthangte pawlkhat genkikna hong nei ning.
A kihel ding thulute in –
➤ AMERICA PAN HONG CIAH DING MYANMAR GAMMITE SAC IN WELCOME CIH THU PULAK
➤ YANGOH KHUALAI A OM AUNGSAN BAWHLUNGKUAN PUAHPHA DING
➤ SHWE MAN KAH KIK
➤ NAYPYITAW PDF MAKAI KHAT IN A GALKAP KHAT DAN PIAKNA PAN SIHSUAH IN VUISIM
➤ MYANMAR GAM PAN THAI GAM AH THAUTANG A KIATNA HANGIN GAMGI KIKAWMNA PAWLKHAT KIKHAK
➤ U-17 AFC LUTTHEIH NADING SIAMNA KISITTELNA AH MYANMAR GAM PAN A KIDEM DING PLAYER TE ONG
……………………………………
➤ AMERICA PAN HONG CIAH DING MYANMAR GAMMITE SAC IN WELCOME CIH THU PULAK
Tulaitak Myanmar gammi US pan hong ciahkik nuamte akua mapeuh ki welcome a, thukhun a palsatte bel amau mawhna tawh kituak in thu ki bawl ding hi cih SAC thugenkhuan a nei General Zaw Min Tun in pulakna nei hi.
America in Myanmar gammite tung ah apiak ahi Temporary Protected Status (TPS) a khakna tawh kisai SAC in Nov 26 in tu a bangin a pulak khiat ahi hi.
General Zaw Min Tun in a pulakna sung ah April 2, 2021 pekpan a hang tuamtuam tawh gampua a pusuak Myanmar gammi khempeuh a ki samkik hi a, thukhun lianpi a palsatte bel thukhenna om ding cih leh a dangte bel mawhmatna a tawm thei pen in ki vaihawm sak ding ci hi. America tung Myanmar gammite hong ciah in 2025 kiteelpi ah zong mee pia thei ding uh ci hi.
Tua banah hih bangin America in TPS a khawlsakna pen Myanmar gam khangto cihna hi cih zong pulak beh lai hi.
……………………………………
➤ YANGOH KHUALAI A OM AUNGSAN BAWHLUNGKUAN PUAHPHA DING
Yangon khualai a om Aungsan Stadium pen mimal 25,000 ta dingin kilam thak ding cih thu pulakna om hi.
Hih tualpi puahphat nading in vaipuak lading committee zong kikoih khin ci hi. Tua committee sung ah Union Minister of Sports and Youth Affairs in makaipi mun la ding a, Union Minister of Construction in makaipi huh dinmun lak ding leh Deputy Minister of Sports and Youth Affairs in thuvanpi vaipuak len ding cih pulakna om hi.
2022 in Aungsan Stadium pen galkap makaipi Min Aung Hlaing in en ngei a, Olympic kimawlna tuamtuamte kimawl theih nading dongah lam kik dingin a pulak khiatsa ahi hi.
……………………………………
➤ SHWE MAN KAH KIK
Tulaitak leitungbup huam ah Shwe man a kah tawh kizui in Myanmar gam ah zong Shwe pek khat khai (၁ ကျပ်သား) ciang 8,750,000 MMK ah kahto a, Nov 25 nikhat thu in 100,000 MMK bang a khangto ahi hi.
Leitungbup huam in Shwe man pen 1 oz ciang 4,155 USD bang hi a, nikhat sungin 1% bang a khangto ahi hi. Ahi zongin tuani nitaklam mahin 4,130 USD ah kia kik a, Myanmar gamah zong pek khat khai ciang 8,710,000 MMK ah kiamsuk kik hi.
……………………………………
➤ NAYPYITAW PDF MAKAI KHAT IN A GALKAP KHAT DAN PIAKNA PAN SIHSUAH IN VUISIM
National Unity Government (NUG), People’s Defense Force (PDF), Naypyitaw Division Military Department (Naypyitaw PDF), Battalion 802 pan Deputy Commander in a galkap khat ahi Hlawn Moe (ရဲဘော်လွှမ်းမိုး) dan a piakna pan sihsuah in kuama theihloh dingin vuisim hi cih PDF galkaplui khat pulakna tungtawn in ki thei khia hi.
Hih thu huhau in galkap Hlawn Moe luanghawm pen Karenni State Police Department (KSP) a kihel siavuan khat, khuasung vaipuakneite leh gamsung vaipuaknei kipawlnate in zongkik uh a, Battalion 802 te giahphual (စခန်း) lui pan leitaw lam 300 ft a ki gamlatna mun ah puanza tawh kizial sa in a kivui siluang khat Nov 22 in pham kik uh hi.
Hih tawh kisai galkapluipa genna ah a beisa April sungin galkap Hlawn Moe pen Drone galkappawl (ဒရုန်းတပ်ဖွဲ့) khat ah training va kah in ရဲမေ khat buan cih mawhsakna tawh a kipuak kik ahi hi. Hih thu huhau in a makai uh Deputy Commander ahi Sayar Kyaung leh vaipuak neite in ခြောက်ပေါက် (ထိပ်တုံး) ah koih a thusit in bawlsia uh hi.
Thusit laitak in galkap Hlawn Moe in dawnding tui a ngetna tungtawn in Commander Okkar in galkap Hlawn Moe ngawng a khe tawh a sikkawm in citui tawh buaksuk ci hi. Tua banah ခြောက်ပေါက် (ထိပ်တုံး) pan lakhia in a pua ah zong bawlsia uh a, tua khit ciang khumkik in tuadan mah in bawlsia ngekngek uhhi cih zong pulak beh hi.
Hi bangin a bawlsiat zawh uh ni thum ni-in galkap Hlawn Moe in hong nusia ta a, Deputy Commander Sayar Kyaung thupiakna tungtawn in a dang galkap giat te in a luanghawm pen kuama theihloh dingin leisung ah a vui uh ahi hi cih pulak hi.
Hih thu tungtawn in mawhpuak anei ahi Deputy Commander Sayar Kyaung @ galkap Naing Lin leh Commander Okkar te galkap sihsakna, a luanghawm selsimna cih thulute tawh Naypyitaw Division Military Department in a za uh pan tawpsak in PDF Military Headquarter in hih thu tawh kisai vaipuak la ding hi cih Naypyitaw a om galkapte tung panin ki thei khia hi.
……………………………………
➤ MYANMAR GAM PAN THAI GAM AH THAUTANG A KIATNA HANGIN GAMGI KIKAWMNA PAWLKHAT KIKHAK
November 30, 2025 in Myanmar gam lam pan thautang te Thailand, Maekokin khua (မယ့်ကိုကင်းရွာ) ah a kiatna hangin Myanmar gammi naupang khat leh uham khat in liamna ngah in inn pawlkhat kisia hi. Tua thu huhau in Thailand-Myanmar gamgi, Mae Sot – Myawaddy ချစ်ကြည်ရေးတံတား simloh a dang Boat Gate (လှေဂိတ်) khempeuh Dec 1 pan ni 7 sung kikhak ding hi cih Thai gam thunei te in pulakna nei uh hi.
Tulaitak in Thailand-Myanmar gamgi Southern Myawaddy a om ahi Minletpan khua (မင်းလက်ပံရွာ) ah SAC galkapte leh KNLA te a kikap laitak uh ahi hi.
……………………………………
➤ U-17 AFC LUTTHEIH NADING SIAMNA KISITTELNA AH MYANMAR GAM PAN A KIDEM DING PLAYER TE ONG
Under 17 Asian Football Confederation (AFC) lut nading siamna sittelna ah Myanmar gam pan a kidem ding tukpeng player te lelh kuamah nei lo in ong uh a, kum 20 sung a khatvei ong na ahi hi.
Myanmar team ahih leh Group G ah kihel in Afghanistan, Nepal, Oman leh Syria tawh a kidem uh hi a, Syria tawh a kidit hang un a dang puai thumte zo uh ahih manin mat sawm tawh a zoto suak uh ahi hi.
Hibang gualzawhna pen a beisa 2016 in Singapore ah khat vei a zawh khit zawh kum 19 khit ciang a kingah kik gualzawhna ahi hi.
General Min Aung Hlaing in zong tutung a gualzo U17 Myanmar team te tein 1,000 MMK pahtawina pia hi cih The Myanmar Football Federation in pulakna nei hi.
AFC ah kidemkhuan a ngah Myanmar football player te ahih leh Saudi Arabia ah a kibawl ding Asian final cup ah a va kidem ding uh ahi hi.
……………………………………
Source: DVB TV News, Eleven Media, BBC Burmese
