Hello! Dam maw Zomi! Tedim Post pan hong muakkik ung. Tuni No kha ni 16 (Nipini) November 16, 2025 kal khat sung thuthangte genkikna hong nei ning.
A kihel ding thulute in-
➤ ZNP GENERAL SECRETARY PU DERIC KAAM ZA AL IN THUGENNA NEI
➤ GAL KIDONA HUHAU IN KALAY-TEDIM MAWTAW SAP TEIN 2 DONG KHANG
➤ HAKHA TOWNSHIP AH SAC IN VANLAM PAN BOMB KHIAT
➤ TAINGEN KHUAKIIM A KIDONA HANG IN A KIIM A OM KHUAMI GALTAI 2000 VALTE HUHNA KISAM
➤ SUNGPAI NATNA TAWH MI TAMPI A SIHLAWHNA HUHAU IN INDIA-MYANMAR GAMGI KIKHAK
➤ KALAYMYO AH KPSSC IN KITEELPI LANGPAN DING KHENSATNA NEI
……………………………………
➤ ZNP GENERAL SECRETARY PU DERIC KAAM ZA AL IN THUGENNA NEI
SAC te makaihna tawh kibawl ding kiteelpi ah teelcing makai kidem in a lutte leh thautawi khangno te ngimna kibang lo-in kimu ngeingai hi. Ken ka hih leh ngimna kibang a, totzia lampi kibang lo hi ci ing. I lungtup pen a kibang hi a thautawi in mapang i ommah bang a policy zia tawh mapang zong i om kul hi cih thu ZNP party pan teelcing tangmi Pyithu Hluttaw panmun ah a dem ding Pu Deric Kam Za Al in genkhiatna nei hi.
……………………………………
➤ GAL KIDONA HUHAU IN KALAY-TEDIM MAWTAW SAP TEIN 2 DONG KHANG
Kalay-Taingen-Tedim kizopna lamzikpi tung ah galkidona hangin kal 2 val sung a kikhak lamdawl totna lampi November 13, 2025 a kipanin kitawn kik thei ta a, mimal khat ciang mawtaw sap tein 2 kila hi.
“Kalay-Tedim mawtawsap nidang in 150,000 mmk ciang kah ngei a, tun ahih leh mi khat ciang tein 2 dong in khan beh hi. Mawtaw khempeuh zong pai ngam nailo hi. Cycle tawh a pai te mi khat ciang 350,000 mmk bang kila in gamlak khawng totkul in lampi zong limsiat mahmah hi” cih khualzin mi khat in pulakna nei hi.
Gal kidona sung ah a awk mawtaw zong tampi om a pawlkhat in lampelh zong in suakta mah leh pawlkhat pen khua tuamtuam te ah awk lai hi. Tu ciangciang vanpua mawtaw te paithei nailo in mawtaw neu te bek pai thei phot hi.
……………………………………
➤ HAKHA TOWNSHIP AH SAC IN VANLAM PAN BOMB KHIAT
Chin State, Hakha township, Ruan khua (ရွာန်း) ah SAC in November 14, 2025 zan 10:00 pm pawlin vanlam pan bomb a khiatna uh hangin khuasungmite inn khat kisia in mipi bangmah cilo hi cih khuasungmite tung pan in ki thei khia hi.
A ki gawm in bomb 4 vei a khiat uh hi a, biakinn man zong them kitam cih pulak beh uh hi.
Ruan khua pen Hakha pan in 35 miles a gamlatna a om khuaneu khat ahi hi.
……………………………………
➤ TAINGEN KHUAKIIM A KIDONA HANG IN A KIIM A OM KHUAMI GALTAI 2000 VALTE HUHNA KISAM
Chin state, Tedim township, Taingen khua kiim ah SAC leh Chin minam thautawite kidona huhau in innlelo nusia in galtai mipi tampite nekledawn leh van zattawm tuamtuam tampi ki tangsam uh cih thu kiza hi.
A beisa October pan kipan in Kalay-Taingen-Tedim lamzikpi tung a om khuami te galtai khin uh hi cih zong CDM Siyin te pulakna tungtawn in kithei khia hi.
Tedim township sung a om Mualpi, Akluai, Theizang, Suahliim, Hiangzing, Taingen, Bekant khua cihte khuasung ah kuamah om ngam lo uh in galtai gai uh hi. Galtai mimal vekpi pen 2000-3000 kiim pha ding hi. Tulaitak in neektawm ding anletui, zatui zaha cihte kisam deuh uh a, galtai mipite lak ah naupang, khanghamte zong kihel hi cih pulakna nei uh hi.
……………………………………
➤ SUNGPAI NATNA TAWH MI TAMPI A SIHLAWHNA HUHAU IN INDIA-MYANMAR GAMGI KIKHAK
Mizoram state, Lawngtlai district ah November kha kipat panin sungpai natna kilawh ngeingai-in a si zong om ahih manin Mizoram leh Myanmar gamgi ahi Paletwa township tawh kizopna Shinletwa gate ah ULA/AA in November 12, 2025 pan themvei sung gamgi khak phot uh hi.
Chin state, Paletwa township leh Shinletwa ah gamsungmi bek hilo khualzin mite zong a kihel sungpainatna thuak mimal vekpi 300 val bang om hi. Paletwa township pan cidamna lam saite leh NGO/CSO te kipawl in natna a kilawhbeh lohna ding in emergency treatment nei uh hi cih zong ULA/AA in November 12 mah in pulakna nei uh hi.
Tu ciangciang Mizoram state, Lawngtlai district sung a om khua 2 panin hih sungpainatna tawh hong nusia mimal 6 om khin hi.
……………………………………
➤ KALAYMYO AH KPSSC IN KITEELPI LANGPAN DING KHENSATNA NEI
Sagaing region, Kalaymyo ah abeisa October sungin a khatveina mipite kikaihkhopna nei uh a, a kihel mipi te in SAC te makaihna tawh kibawl ding kiteelpi thapia lo-in langpan ding khensatna nei uh hi cih thu Kalay Township People’s Strike Steering Committee (KPSSC) in November 11, 2025 in laisuahna nei uh hi.
KPSSC in tupna kibat pih kipawlna, itna, veina a nei kipawlna tuamtuam te leh gamsung gampua a om te tawh khut kilen khawm in mapang khawm ding hi ung cih zong pulakbehna nei uh hi.
……………………………………
Source: Chin World / Khonumthung Burmese
