Hello! Dam maw Zomi! Tedim Post pan hong muakkik ung. Tuni Phal kha ni 12 (Nipini) October 12, 2025 kal khat sung thuthangte genkikna hong nei ning.
A kihel ding thulute in-
➤ MINDAT KHUASUNG AH SAC IN KHANGNO TE OMNA A LIMDO DIAKNA HUHAU IN PILSINSANG TE THEMVEI KIKHAK PHOT DING
➤ PALETWA KHUA AH KHUASUNGMI KHAT ULA/AA IN KAL (2) SUNG A MAT KHIT UH TEH KIKHAHKIK
➤ CHIN STATE AH GALTAITE ZUATDIAKNA MUN KHUA 13 TE AH A KISAMDEUH NEKLEDAWN TE NCCD IN HAWMKHIA
➤ MYANMAR GAM SUNG AH SANGTAWP MIMAL A TAMPENNA MUNTE LAK AH CHIN STATE ZONG KHAT IN KIHEL
➤ KALAY MYO AH TADINKYUT KHUAIMEIVAK LUNGPHONA KINEI
……………………………………
➤ MINDAT KHUASUNG AH SAC IN KHANGNO TE OMNA A LIMDO DIAKNA HUHAU IN PILSINSANG TE THEMVEI KIKHAK PHOT DING
Chin state, Mindat khuasung ah SAC in khangnote omna mun ahi pilsinsang, boarder saung cih munte ngim in limdo deuh uh hi. Tua huhau in Mindat khuasung a om pilsin sang te Oct 10,2025 nipan in themvei sung kikhak phot ding hi cih khuasung makai te’n zaksakna nei uh hi.
Mindat khuasung a om Wamatu(ဝမ္မသူး) khua leh Thinchiaung(ထင်ချောင်း) khua a om pilsin sangte ah SAC in October 8,2025 ni-in vanlamtawh dona nei uh hi. Sangnaupang mi (3) leh disabled (1) in sihlawh in, liamna ngah mi (20) val om hi.
Khuasungmi te teenna inn (6) zong kisia hi.
……………………………………
➤ PALETWA KHUA AH KHUASUNGMI KHAT ULA/AA IN KAL (2) SUNG A MAT KHIT UH TEH KIKHAHKIK
Chin state, Paletwa township, Daletmay Chiaung (ဒလက်မေချောင်း), Daletsar (ဒလက်စာ) khua a om khumi mi U Sani Aung@ Beung Kang pen ULA/AA in kal 2 sung a matcip khit uh ciang October 6,2025 ni-in khahkhia kik hi.
Daletmay khua a om ULA/AA zum ah U Beung Kang pen ULA/AA makaipa in zum ah a pai nading in September 20,2025 ni-in sam hi. Thusitna tuamtuam nei-in tua ni pan a mat uh October 6,2025 ni-in khah kik uh hi.
“U Beung Kang pen ong suahtak zawh hoihtak thu kidong tel thei nai lo hi. A tung in a kimatna pen ULA/AA gamkantanna thu a ma tungtawn pan in kizel khia hi ci-in mawhmatna thu tawh a sam uh hi.”ci-in khuasungmi khat in gentelna nei hi.
……………………………………
➤ CHIN STATE AH GALTAITE ZUATDIAKNA MUN KHUA 13 TE AH A KISAMDEUH NEKLEDAWN TE NCCD IN HAWMKHIA
Chin minam galtaite zuatdeuhna mun ahi Tedim township, Mindat township leh Mizoram gam mun pawlkhat ah a kisamdeuh nekledawn te ahi antang,sathau,cii cihte October 1-9 sungteng in Network for Chin Community Development (NCCD) in hawmkhia hi cih thu makai ten October 9,2025 ni-in tangko khia uh hi.
Tedim township ah mun (5), Mindat township ah mun(2) leh Mizoram State, SaiHaa township ah mun (6) akigawm in mun (13) ah huhna kihawm khia hi.
Hih NCCD pen 1995 pan in a kiphuan khia hi a, Chin state huam ah khangnote panpihna ding leh khuasung puah ding lunggulhna tawh a kiphuankhia kipawlna ahi hi.
……………………………………
➤ MYANMAR GAM SUNG AH SANGTAWP MIMAL A TAMPENNA MUNTE LAK AH CHIN STATE ZONG KHAT IN KIHEL
Myanmar gam sung ah sangtawp/sangkahlo naupang a tampen na mun Regions leh States lak ah Chin state pen khat in kihel hi ci-in UNDP-Myanmar in October 6,2025 ni-in a thusuahna tungtawn in kithei khia hi.
Kum 18 pan 24 kikal khangno mi 4 lak ah mi 3 kiim phial in sangkah lo, pilsin ding in tintan khatbeek kah lo in ki om hi ci hi.
A diak in khualam pan phutding haksatna tam deuh ahih manin sangkah lo naupang kitam mahmah hi. Tanintari, Chin, Kayin leh Sagaing te ah sangtawp kitam diak lai hi.
UNDP-Myanmar i survey tungtawn in numeino seh 4/5 in innsung vaipuak tuamtuam lakna hang in sangkah thei nawn lo hi. Pasalno te lak ah tua dan 5% om hi. Hidan in sumlepai haksatna, gentheihnate hang in sangkah lo in i omna in khantohna lam hilo in kiamsukna lam hong manawh pih mahmah ahih manin lauhuai mahmah hi ci-in UNDP-Myanmar in thusuahna nei hi.
……………………………………
➤ KALAY MYO AH TADINKYUT KHUAIMEIVAK LUNGPHONA KINEI
Kalay myo ah Public Struggle Committee i makaihna tawh October 6,2025 ni-in Kalay myo khuasung munkhat ah khuasungmi pawlkhat in “ဓမ္မကိုပူဇော်၊ အဓမ္မကိုလောင်ကျွမ်း” cih ngimna tawh lungphona nei uh hi.
……………………………………
Source: Chin World
