Hello! Dam maw Zomi! Tedim Post pan hong muakkik ung. Tuni Phal kha ni 5 (Nipini) October 5, 2025 kal khat sung thuthangte genkikna hong nei ning.
A kihel ding thulute in-
➤ TEDIM TOWNSHIP LEZANG KHUA AH PDA IN KHUASUNGMI MIMAL 10 GALKAP TUM DING IN MAN
➤ PDF ZOLAND KHUTSUNG AH TEDIM KHUAPI SAC GALKAP MI 2 GALVAN PAWLKHAT TAWH KI-AP
➤ HAKHA KHUAPI LEH TEDIM KHUAPI AH MEE KHIA THEI MIMAL SAZIAN TE KISUANG TA
➤ PALETWA KHUA AH SAC IN VANLAM TAWH A DONA HANG IN NUMEI NIH IN HONG NUSIA
➤ KANPALET TOWNSHIP AMPONE KHUA (အမ်ပုံ) LEH SAN EAIN NUE KHUA(စံအိမ်နူး) KIKAL LAMPI SIATNA HANG IN KHUASUNGMITE IN GENTUAK
➤ SAC IN VANLAM PAN LEH GALVAN LIAN PAWLKHAT TAWH A DONA HANG IN CHIN STATE SUNG AH KUM 4 SUNG MIMAL 101 IN SIHLAWH
……………………………………
➤ TEDIM TOWNSHIP LEZANG KHUA AH PDA IN KHUASUNGMI MIMAL 10 GALKAP TUM DING IN MAN
‘’Tedim township, Lezang khua ah khuasungmi mamal 10 te galkap tum ding in Chinland Council lak ah a kihel People Defense Army(PDA) in zawhthawh thu tawh a mau utna omlo pi-in September 29,2025 zingsang lam in kaai hi” cih Lezang khuasungmi khat in pulakna nei hi.
PDA te pen Lezang khua ah September 28,2025 ni-in tung uh hi. Khangno te bansap in galkaptum ding in mee bansawk sak a, mee pauh mimal 10 te a zingciang September 29,2025 ni-in khuasung pan paikhiat pih uh hi. Bektham lo in lokuan ding a pai khuasungmi te lamkal ah pang uh a, gammihihna card(NRC) sit-in a pua lo peuhpeuh kilehsak kik cih bang in bawl uh ahihman in lokuan ding takpi NRC puak kul hi cih khuasungmite in pulak khia uh hi.
“Tu a kamat uh pen galkap tum ding hilo in ပြည်သူ့စစ် traning a kah ding uh hi. A beisa in zong hidan khatvei kihih ngei khin a, galkap a ut suak te kitum sak in a ut lote kiciah sak kik in khuasung kem ding in kikoih hi. Lezang khua te zong galkap tum ding hilo in Pyituhsit training kah ding in kisam hi. Mee sawksak na zong Pyituhsit training kah ding khuasung mi te in teelhak a sakna tungtawn in a kisawk sak hi” ci-in PDA makai khat in pulakna nei hi.
……………………………………
➤ PDF ZOLAND KHUTSUNG AH TEDIM KHUAPI SAC GALKAP MI 2 GALVAN PAWLKHAT TAWH KI-AP
Chin state, Tedim khuapi a om SAC KHALAYAH – 269 pan galkap (2) Tedim khuapi bulphuh in a om PDF-Zoland te khut sung ah galvan pawlkhat tawh ki-ap uh hi cih October 2,2025 ni-in PDF-Zoland in pulakna nei hi.
Tedim khuapi a om SAC KHALAYAH-269 pan kum 37 a pha U NyiNyiSwe(တပ်ကြပ်), nambat 533580 leh kum 22 a pha Mg Khaing Cho Htoo, nambat ပစ-၁၃၃၃၀၃၇ te galvan pawlkhat tawh October 1,2025 ni-in PDF-Zoland khutsung ah ki-apna nei uh hi.
……………………………………
➤ HAKHA KHUAPI LEH TEDIM KHUAPI AH MEE KHIA THEI MIMAL SAZIAN TE KISUANG TA
Chin state khuapi a hi Hakha leh Tedim khuapi ah mitam zawk deuhna lamgei munte ah SAC makaihna tawh a kibawl ding kiteelpina ah mee khia thei mimal sazian te September 30,2025 pan kipanin kisuang kawikawi ta hi.
Kiteelpina ding in mee khia ding mimal saziante September 30,2025 pan kipan in October 13,2025 nidong hausa zum te ah kisuang ding hi. A khatveina ni 14 sung kisuang ding hi cih SAC lampan pulakna nei hi.
Innkuanlai kibawlna mun ah i min om ding hi. I min paa/paa lo cih zong ve ki en thei hi cih zong pulakna neih beh uh hi.
……………………………………
➤ PALETWA KHUA AH SAC IN VANLAM TAWH A DONA HANG IN NUMEI NIH IN HONG NUSIA
Chin state, Paletwa township ah SAC galkapte in Jet Vanleng tawh 500lb bomb tang 3 tawh September 29,2025 sunhun 12:30pm in do uh hi. Tua huhau in khuasungmi numei 2 in hong nusia a,liamma a ngah mimal tampi om hi cih Paletwa khuasungmi te in a pulakna tungtawn in kithei khia hi.
“Hong khiat uh pen tang 3 hi. 12:30pm in tangkhat, tua zawh minutes 5 ciang in tangkhat, 12:40pm ciang in tangkhat a kigawm in tangthum hong khiat uh hi. Numei 2 in hong nusia pah in a dang liamma a ngah mitampi ki om hi. Liamma a ngah te lak ah a gim zong om hi” cih Paletwa khuami khat in pulakna nei hi.
……………………………………
➤ KANPALET TOWNSHIP AMPONE KHUA (အမ်ပုံ) LEH SAN EAIN NUE KHUA(စံအိမ်နူး) KIKAL LAMPI SIATNA HANG IN KHUASUNGMITE IN GENTUAK
Chin state, Kanpalet township, No.5 munhuam ahi Ampone khua leh San Eain Nue khua kizopna lampi ah a beisa kal khat sung teng guah tamluatna huhau in phung kicim in lampi kisia hi cih khuasung makai te in October 1,2025 ni-in pulakna nei uh hi.
Phungcim-in lampi kisiatna mun pen San Eain Nue, KhihTaw Khua, Ma SuiTui khua, ToneNge khua,HlaLawngPan khua teng in annek tuidawn ding van kisam tuamtuam te a puak uh teh a zat uh lampi hi. Hi bang in lampi ong siat ciang khuasungmi khempeuh genthei mahmah hi cih zong pulakbeh uh hi.
Hih lampi sia pen No.5 makai te in puahphat ding a hanciam laitak uh hi. A nai a gamla a om khuanu khuapa te’n zong nong panpih na ding uh cih zong pulakna neih beh uh hi.
……………………………………
➤ SAC IN VANLAM PAN LEH GALVAN LIAN PAWLKHAT TAWH A DONA HANG IN CHIN STATE SUNG AH KUM 4 SUNG MIMAL 101 IN SIHLAWH
2021 panin September 30,2025 nidong SAC in vanlam leh galvan lian pawlkhat tawh Chin state sung a dona huhau in mimal 101 in sihlawh hi cih thu AAPP in October 1,2025 a pulakna tungtawn in kithei khia hi.
Assistance Association for Political Prisoners (AAPP) thusuahna tungtawn in 2021 panin September 30,2025 dong ah vanlam leh galvan lian tawh SAC in a dona huhau in gambup huam ah a si mimal 3023 om hi. Mimal khatkim ciat a mintawh kituak in kikipsak thei hi. A min tawh kituak in a kikipsak thei nailo mimal a tawmpen 2690 zong omlai hi cih kithei khia hi.
Tua khempeuh lak ah numei bebek mimal 1370 kihel in, pasal pen 1653 pha hi. Kum 18 cing nailo naupang mimal 647 pha hi.
……………………………………
Soure: Chin World
