Hello! Dam maw Zomi! Tedim Post pan hong muakkik ung. Tuni Theino sih kha ni 4 (Nipini) January 4, 2026 kal khat sung Zogam thuthangte genkikna hong nei ning.
➤ NUG IN VETERAN POLITICIAN PU GIN KAM LIAN NGONGTATMI CI-IN MAWHSAKNA PAN DOKKIK
➤ TEDIM TOWNSHIP, SEZANG KHUA AH SAC TE’LOT THAUPI HANGIN NAUPANG KHAT IN HONG NUSIA-IN, KHAT IN LIAMNA NGAH
➤ TEDIM TOWNSHIP, KENNEDY MUAL TUNG AH SAC GALKAPTE TAWH KIDONA HANGIN MIPI THAUTAWITE IN HONG NUSIA
➤ TEDIM-KALAY MYO LAMPI AH MAWTAW KHAT ZONG KIPAI SAK NAWN LO IN LAMPI KIKHAK HI CIH PDF-ZOLAND MAKAILAM TE-IN TANGKONA NEI
➤ FALAM TOWNSHIP KIDONA AH GALVAN PAWLKHAT LEH SAC GALKAPTE A HINGTANG IN MI 4 CNO/CNDF IN MAN
……………………………………
➤ NUG IN VETERAN POLITICIAN PU GIN KAM LIAN NGONGTATMI CI-IN MAWHSAKNA PAN DOKKIK
National Unity Government of Myanmar’ i Counter-Terrorism Center in ukna buluah galkapmang Min Aung Hlaing, Doctor HmuThang, Zomi Veteran Politician Pu Gin Kam Lian kihel in SAC member mimal 33 te ngongtatmi hi ci-in December 21,2025 ni-in tangkona nei uh hi. Tua lak panin Pu Gin Kam Lian pen ngongtatmi ci-in mawhsakna pan dokkikna lai tangkona December 29,2025 ni-in nei kik uh hi.
……………………………………
➤ TEDIM TOWNSHIP, SEZANG KHUA AH SAC TE’LOT THAUPI HANGIN NAUPANG KHAT IN HONG NUSIA-IN, KHAT IN LIAMNA NGAH
Tedim Township a om khahlahyah 269 panin SAC galkapte in December 29,2025 nitak 4:30pm pawlin thaupi lawn uh in Sezang khua sung ah tu hi. Tua thaupi-in Sezang khuami naupang kum 8 a pha pasalno Tg. Pau Muan Sang kha in, hong nusia pah hi. Khat in zong liamna ngah hi.
Hong nusia pah ahi i sanggampa pen ahih leh nitak annekna kuang teng sawp in innka ah a om laitak thaupi-in kha hi. A kawngnuai siah zanphial in, a lu ah zong thautang khakna hangin liamna ngah a, a phual ah hong nusia pah ahi hi. Amah pen unau lak ah a neu pen hi-in, Grade-1 a sin laitak ahi hi. A luang ahih leh January 1,2026 ni-in han kitang sak hi.
Liamna ngah i sanggam pa pen kum 14 apha Tg. Lian Za Huam ahi hi. Amah zong annek laitak mah in thaupi’khak ahi hi. Thaupi’n a khak phetin a innkuanpihte in Sezang ZYA mawtaw omna mun dong saikel tawh paipih pah uh hi. ZYA mawtaw in zato puak pah a, zato a tun uh teh a ma’ U pa’ khut ah zong thautang them in a khakna hangin liamna a ngah lam mu uh hi. Anih un bel a lauhuai lua hisam lo hi.
“Sezang khuasungmi khuakhung lam a tengte a vek phial un khuataw lam ah taisuk uh hi.”cih zong khuasungmite tungtawn in kithei khia hi.
……………………………………
➤ TEDIM TOWNSHIP, KENNEDY MUAL TUNG AH SAC GALKAPTE TAWH KIDONA HANGIN MIPI THAUTAWITE IN HONG NUSIA
Chin State, Tedim Township, Kennedy mual ah SAC galkapte leh mipi thautawi PDF-Zoland te kidona om a, mipi galkap mimal 2 in hong nusia uh hi.
Tedim Township, Kennedy mual kidona panin December 27,2025 ni-in PDF-Zoland galkap ahi Tg. Pau Sum Lian in hong nusia a, December 29,2025 ni-in Tg. Khenpi in hong nusia kik hi.
“Tg. Khenpi ahih leh Zoland Shield Campaign a kipan a kisam bangbang in thasial lo takin a kipiakhia khat hi.”ci-in zong a lawmte in pulakna nei uh hi.
Hong nusia galkapte it mahmahna thu leh a nusiat uh innkuanpihte tawh a kibang in dah mahmahna thu a lawmte in pulak uh a, “innkuante in zong tapa khat a sumh na hih mah bang un, ko zong lawm ithuai mahmah khat a sumh hi ung”ci-in pulakbehna nei uh hi.
Tuni dong in Kennedy mual ah kidona khawl nai lo hi.
……………………………………
➤ TEDIM-KALAY MYO LAMPI AH MAWTAW KHAT ZONG KIPAI SAK NAWN LO IN LAMPI KIKHAK HI CIH PDF-ZOLAND MAKAILAM TE-IN TANGKONA NEI
Chin State, Tedim Township leh Sagaing District, Kalay Myo kikal kizopna lampi pen mipi’ bitna ding lunggulhna tawh totloh phot ding in PDF-Zoland’ Battalion Commander Kimtawng in December 29,2025 ni-in pulakna nei hi.
Gal kidona a nasiat mahmah hun laitak ahih manin saikel ahi a, mawtaw ahi zong in kipai sak lo ding hi. SAC te’ lampan in zong vanleng tawh bomb khiakhia laitak uh ahih manin mipite ading in lauhuai hi. Mipite in nong telsiam nading un hong thum ing cih zong pulak behna nei hi.
“Lampi vai a dong deuhte ading in, a tuaksuk, a paito a vekin kikhak phot hi. Pawisim nuam, inn ciah nuam cihte tawh khuan hong ngen vet kei un. Naupangte in a mau nuntakna kham in gal a sim uh hi.”ci-in zong pulak thuah hi.
……………………………………
➤ FALAM TOWNSHIP KIDONA AH GALVAN PAWLKHAT LEH SAC GALKAPTE A HINGTANG IN MI 4 CNO/CNDF IN MAN
“Chin State, Falam Township, KhungLi khua lam panin a kuan SAC galkapte leh Chin minam thautawite kidona ah December 29,2025 ni-in Chin minam thautawite in galvan pawlkhat leh SAC galkapte mimal 4 galmat in hingmat uh hi.”ci-in CNO/CNDF thugen khuan a nei Salai Timmy in pulakna nei hi.
“Khunli khua pen Falam pan tai 10 (10miles) kigamla a, tulaitak in kidona nasia mahmah hi. Tua ban ah mipi thautawi lampan zong mimal 3 in hong nusia hi.”ci-in Salai Timmy in pulakbehna nei hi.
Source : Chin World, The Zoland Post
……………………………………
