SAC khutnuai-a om UEC kaihkhop mee saziante a maan lo tampi om hi ci-in Naypyitaw pan USDP makai U Hla Swe in ama Tiktok tung pan Oct 5 in genkhia hi.
U Hla Swe genna ah mee sazian a kisuanna munah a va et ciangin khialhna tampi mu a, 2020 kum a mee sazian suang kik hi ding uh hi ci-in pulak khia hi. Khua sung hausate’n a kaihkhop thak uh mee sazian hi lo a, mee 500 ah 300 bang kikhai hi cih zong pulak khia hi.
Tua teng banah veng pawlkhatte ah hausate’ innkuanpihte min zong kihel lo hi. Ahi zongin a si sate leh mundang ah phualtuan khin pawlkhatte’ min kihel kik ci hi. Hluttaw ah tangmi dinga a kihel khat a ma min bek kihel in a innkuanpihte min kua mah kihel lo hi. Mee maanlohna hangin Hluttaw tangmite leh SAC mun piak hausate tawh mee sazian sit kik ding uh a, a manlang thei pen in mee sazian puahphat kul ding hi cih zong genbeh lai hi.
Ahih hangin Oct 6 sun lam ciangin U Hla Swe in tiktok ah a tunga thuteng a genna video phiat kik hi.
UEC in September 30 – October 13 kikal in a masa pen mee sazian pulak khiat ding gen uh hi.
……………………………………
Source: BBC Burmese
