SAC galkapte vaihawmna tawh a ki bawl ding Nationwide Casefire Agreement (NCA) thukimna lai kum 10 cin kimuhkhopna ah kihelloh na ding NCA thukimna lai sung ah suaikai ahi minam thautawi kipawlna 10 lakpan 6 te-in international ambassador te tung ah a kipawl in hanthawn uh hi.
Hih kum 10 cin kimuhkhopna ah NCA thukimna suai ki kaih lai in teci a om gamdang muntuam pan gam makaite zong kihel ding cih General Min Aung Hlaing in a pulak khit zawh thautawi kipawlna 6 te-in tu-a bangin lai a suah khiat uh ahi hi.
Gamsung ah thauvui thautang tawh kido kikapna khawlsan ding cih thukimna lai NCA kum 10 cin kimuhkhopna pen mipite tung bomb a khiat leh khangnote galkap tum ding in a man ziauziau ahi SAC galkapte ii kineihkhemna khat hi lel hi cih October 13, 2025 in thautawi kipawlna te’n a laisuahna sung uh ah pulak uh hi.
Presiden U Thein Sein hun lai in NCA thukimna lai ah United Nations, European Union, American, Japan, Thailand, China, leh India te zong teci in aki hel uh ahi hi.
SAC vaihawm hih kimuhkhopna ah kihelloh ding a hanthawn thautawi kipawlna te in Karen National Union (KNU), All Burma Students’ Democratic Front (ABSDF), Chin National Front (CNF), New Mon State Party (NMSP), Pa-O National Liberation Organization (PNLO), leh Lahu Democratic Union (LDU) te ahi hi.
SAC makai Min Aung Hlaing in NCA kum 10 cin kimuhkhopna ah international pan teci teng zong sam ding ahih lam October 9, 2025 in Malaysia Foreign Affairs Minister ahi Mohamad Hasan tawh Naypyitaw ah a ki muh lai in a gen ahi hi. NCA thukimna lai sung ah suaikai nailo thautawi kipawlna te zong ki sam a, suai a kai khin te tawh zong kimu ding cih zong pulak beh hi.
Source: BBC Burmese
……………………………………
