Tun kha 18, 2026 ❖ THE TEDIM POST
Myanmar-Thai gamgi ah sumlei- sumzuaknate kipat kik theih nading, daihna om kul ahih manin gamgi dung ah a om minam thautawi kipawlna tuamtuamte leh SAC galkapte kiho in kilemna a om theih nading Sengam, Phuket khuapi ah SAC’ Foreign Minister U Than Swe leh Thai Foreign Minister Sihasak Phuangketkeow te kimuhna ah Thai in huhna pia nuam ci’n pulak hi.
Tua banah, Thai kumpi leh PTTEP (oil & gas company) in Myanmar gam ii Oil and Natural gas lamsang ah investment a bawl nading vai zong kikum uh hi.
Myanmar gam pen ASEAN kipawlna sungah muibubtak-in hong kihelkik nading Thai gam in a lunggulhna a pulakna in ASEAN thukimna nam 5 (5-point consensus) teng Myanmar gam lam pan zuih ding a thupitna thu zong U Than Swe’ tungah gen hi.
U Than Swe in a genkikna ah, Myanmar gam ah kiteelna (election) man khin a, Myanmar Kumthak ahi tuibuahpawi(Thingyan) ma-in kumpi thak (new government) hong kah zawh nading kihanciam hi. Hong kahthak kumpi in kilemna (peace) ngah theih nadingin a kisai mimal khempeuh kihona lianpi a om nading geelna kinei hi ci’n U Than Swe in pulak hi.
Source: BBC Burmese
