Tun kha 16, 2026 ❖ THE TEDIM POST
2025 kum pen China leh Myanmar kizopna ah thupi mahmah a, gam nih kikal kizopna ah dinmun thak khat kitung hi ci’n Chinese Ambassador Ms. Ma Jia in Tun kha 15,2026 in Yangon khuapi ah a kibawl ahi Chinese New Year pawi ah gen hi.
2025 kum sung in Chinese President ahi Xi Jinping leh general Min Aung Hlaing nihvei kimu uh a, kizopna hoih semsem theih nading in kamkupna nei uh hi.
Kizopna bek hilo in gam nih kikal summet bawlna ah 19% khang a, China in Myanmar gam ah a investment 230% dong bang kah to hi.
A hi zong in koimun lian ah invest uh cih genna om lo hi.
A beisa Kau kha (December) dong Myanmar Investment Commission (MIS) ciaptehna dung zui in Singapore, China leh Thailand te Myanmar gam sung ah investment a tampen ahi uh hi.
Hih pawi ah a kihel ahi Vice Senior General Soe Win in China gam i projects tuamtuamte a hanciamna leh a sepnathu gen hi. Tua lak ah Kyaukphyu Deep Sea Port Project (ကျောက်ဖြူရေနက်ဆိပ်ကမ်းစီမံကိန်း), Myitsone Hydropower Project (မြစ်ဆုံရေအားလျှပ်စစ်စီမံကိန်း), Oil and Gas Pipeline Project (ရေနံနှင့်သဘာဝဓာတ်ငွေ့ပိုက်လိုင်းစီမံကိန်း ) cihte kihel hi.
Tua thamlo-in China leh Indian Ocean ading pusuahna ahi “Kyaukphyu-Kunming” kikal meileng vai, Mandalay-Kyaukphyu leh Muse-Kyaukphyu kizopna meileng vaite a taksuak nading hanciam in kisem laitak cih zong genna nei hi.
China i seplebawlna omna ahi Rakhine State, Kyaukphyu pan China gam Kunming dong a tung ding meileng lampi ahi “Operation 1027” pen AA galkapte in Rakhine gam a simna hangin tu laitak kikhawl (stop) hi. Myanmar gam lam ah hih nasepna a kikhawl hang in China gam lam ah ahihleh a khenkhat kizo khin ta hi ci-in kigen hi.
Muse-Kyaukphyu meileng lampi kizopna pen (China-Myanmar Economic Corridor) sung ah nasepna thupipen khat ahi hi. China in Muse-Kyaukphyu nasepna lianpite galkap kumpi (SAC) tawh sep ding sangin, kiteelna pan a gualzo kumpi thak tawh sep ding in ngaihsunzaw uh hi cih thukante tungtawn in kithei khia hi.
Source: BBC Burmese
