Tun kha 19, 2026 ❖ THE TEDIM POST
Chin State, Hakha Township sung a om ahi Zokhua, Cinkhua leh Falam Township sung a om Lumbang khuate ah SAC in Tun kha 19, 2026( February 19, 2026) ni sunnung 1:00pm pawlin vanlam tawh bomb khiat uh hi. Kidona om hi lo pi mah a khiat uh hi-in khuasung a om mipite a liam a bai tampi om a, innlelo zong tampi kisia hi.
“Zokhua ah bomb khia masa uh-in khuasung a om inn 3 kisia hi. Tuakhit teh Cinkhua khuakiim ah zong bomb khiat uh a, tuamun ah ahih leh innlelo tampi kisia in mipi 3 in liamna ngah hi.”ci-in khuasungmite in pulak khia uh hi.
Bomb in a khak mi 3te lakpan mi 1 in nuntakna a lauhuai zah dong in liamna ngah ahih manin Hakha kumpi zato ah kibawl laitak hi.
Falam Township sung a om Lumbang khua ah zong Tun kha 19, 2026 (February 19, 2026) ni sunnung 1:30pm pawl mahin Y12 vanleng tawh bomb khiat uh hi. Tua huhau in innlelo pawlkhat a kisiat ban ah khuasungmi numei khat in zong liamna ngah lawh hi.
A beisa Tun kha 10, 2026(February 10,2026) ni-in zong kidona omlo pi mah in Thantlang Township, Talankhua ah bomb khiat uh hi. Tua hang in khangcingsa papi khat a kihel in mimal 6 in hong nusia hi.
Source: Chin World
