Thu tuamtuam hangin mun kimah kiteelna a kibawl zawh loh hangin hong kah thak ding makaite leh UEC makai in by-election tawh kiteelna neih veve ding galkap mangpi Min Aung Hlaing in gen hi.
October 15, 2025 in Myanmar International Convention Centre 1 ah a kibawl tualsung kidona bei nading thukimna NCA kum 10 cin ki muhkhopna ah a gen ahi hi. Hih kimuh khopna ah nailang sung khawng thu a gen khit ciangin ka lungsim ah a om thu hong gen suak ning ci-in 10 mins khawng a genbehna ah a hel ahi hi.
Hong tung ding December 28 in a masa pen kiteelna township 102 ah kinei masa dinga, a nihna ah township 100 ah kiteelna zop suak ding gen hi. UEC pulakna ah bel a masa pen kiteelna December 28 ni kinei dinga, a zomte pen bang hunah kizom ding cih gen nai lo uh hi. Tua ban ah hih kiteelna ah thumaan lo kiteelna ahih loh ding galkap mangpa in gencian kik hi.
Tualsung kidona bei nading thukimna (NCA) ah a kihel ahi Karen National Union (KNU), All Burma Students’ Democratic Front (ABSDF), Chin National Front (CNF), New Mon State Party (NMSP), Pa-O National Liberation Organization (PNLO), leh Lahu Democratic Union (LDU) te in NCA kum 10 cin ki muhkhopna ah ki helloh ding Oct 13 ni lai suak sak uh a, NCA tawh kisai atawpna in amau lungsim puakzia a pulakna uh zong hipah hi.
Source: BBC Burmese
……………………………………
