Myanmar gam panin Sen gam ah a ki puak bepumte ekleiza (Pesticide) a banglai tamluatna hangin Sen gam in nolhkik a, Myanmar gam ah puakkik uh cih thu Sen gam tawh vanlei vanzuak kizopna lam a thei mi khat in pulakna nei hi.
Tua bepumte sungah Thiamethoxam leh Triazophos a kici ekleiza (Pesticide) nam nihte tampi kihel ahih manin a ki puakkik hiding hi cih zong genbeh lai hi. Sen gam in a puakkik bepumte pen Myanmar gam pan company 22 in container 22 dim in a puak (a gihna ton then khat) zah bang a pha ahi hi.
Hih thupiang tawh kisai-in Myanmar gam sung om ekleiza (Pesticide) zuak companyte-in lokho mite tungah ekleiza (Pesticide) tawh kisai awareness piakna omlo pi-in pum zuak uh ahihna leh hih thupiangte hoihtak a etphat zawh kei vua leh mailam ah losung nekpiangte gamdang puak nasepna zong hong haksa to tektek ding hi cih zong pulak khia hi.
Myanmar gam pan apiang bepum te a tamzaw pen Sen gam ah a kipuak hi a, beli leh behiangbe namte ahih leh India gam ah kipuak ahi hi.
Source: BBC Burmese
