Tun kha 28, 2026 ❖ THE TEDIM POST
Tun kha 27,2026 (February 27,2026) in Pakistan te’ Defense Minister in Afghanistan tawh gal kido ding hi ungh ci in a kitel tak in pulakna nei hi. Hih pulakna pen Tun kha 26,2026 (February 26, 2026) in gam nih kikal gamgi ah a kikapna uh nungzui ahi hi.
X a kici ahi Twitter zong a kici ngei app tung ah Pakistan te Defense Minister Khawaja Mohammad Asif in Afghanistan gamsung a om thautawi kipawlna Taliban te dai ta ding cih lametna a neihna thu genkhia hi.Taliban te in Afghanistan gam pen India gam te’ khutnuai ah koih uh ci lai hi.
Tua ban ah ka lungduaina uh kiciangtan ta ahih manin tun ko kikal ah gal bek om ta ding hi ci’n a thugenna khup hi.
Hih thu teng hong pianna a hang pen Taliban te in Pakistan galkapte omna munte ah bomb a khiat man uh ahi hi. A beisa kum, 2025 kum in hih gam nih kikal kikap nawn loh nading thukimna kinei khin uh hi mah leh Laizingni in nai nih sung bang a gamgi uh ah a kido uh ahi hi.
Laizingni ma in Pakistan te in Afghanistan gam sung ah van lam tawh bomb khiatna nei uh a, mimal 18 bang si uh hi ci’n Tun kha 24,2026 (February 24,2026) in thukan Reuters te in pulak uh hi.Pakistan te in ahih leh hih thu pen pom pih lo uh a, mipite a kap sawm ka hikei uh hi ci’n pulak uh hi.
Source: Fox News
