Israel in Lebanon gam khanglam leh nisuahnalam a om khuano lite kihep ding thu a piak khit uh a sawtlo-in, Lebanon gamsunga Hezbollah leh Hamas thautawi kipawlnate paulapin do uh hi.
Israel galkapte’ aitaanga thugen khat in hih thu a pian ma-a thugenna ah, vanlam tawh Hezbollah leh Hamas thautawi kipawlnate pen a do sawm lam uh genkhin hi. A do sawmna uh khuanote ahihleh Lebanon gam nisuahnalam a om Hammara leh Ain el-Tineh khuanote hi-in, gam khanglam ah zong Kfar Hatta leh Annan khuanote ahi hi.
Kfar Hatta khuano pan zong innkuan tampitak Israel-te vauna hangin tai uh a, ambulance leh meiphelh mawtawte zong nasem thei pah dingin kigingkhol uh ci hi.
Lebanon-te Health Ministry in a thugenna ah gam khanglam a om Braikeh khuano ah Pizingni, January 5 in drone tawh mawtaw khat a kikapna hangin mi nih nak liam mahmah ci uh hi. Israel-te in hih pen Hezbollah thautawi kipawlna sunga kihel mi nihte a kap hi ung ci uh hi.
Nipini, January 4 in Ayn al-Mizrab khuasung ah mawtaw khat mah Israel-te in kap leuleu na-uh hangin mi nihte’ nuntakna beilawh hi. Israel-te in hih zong Hezbollah thautawi kipawlna a kihel mi khat a kap uh hi ci-in dawng uh hi.
2024 kumin Israel leh Lebanon kikal US in lemtuah khin himah taseleh Israel in manglo bek thamlo, Lebanon gamsung mun nga bangah om lai uh hi. Lebanon kumpi in US pan leh Israel kiang pan Hezbollah thautawi kipawlna pen nasep khawlsak nading vauna nakpitakin ngah uh hi.
Lebanon kumpite pen Pithaini, January 6 in Hezbollah tawh kisai thukupna nei dingin kilamen hi. Kido nawnloh nading tawh kisai a encian dingin Lebanon, Israel, France, US leh UN-te in kipawlna khat seh ding ci hi. Kilemna thu manglo-in Israel in Lebanon a do vevena hangin Lebanon mi za leh sawmnih leh sagih bang ii nuntakna beilawh hi.
Source: Aljazeera
