Dota kha 28, 2026 ❖ THE TEDIM POST
Tedim township sunga om Dimpi khua mi Tg. Kham Ngaih Pau pen Dota kha (March) 27, 2026 ni-in PDF-Zoland te’n galkap dingin a kaihkhopna pan a taisimna panin a pheiphung ah sigui kitan in si limluan ahih manin Tedim kumpi zato ah ki puak hi cih thu Dimpi khua mite tung pan kiza hi. A beisa Dota kha 26, 2026 ni zan in Tedim township sunga om PDF-Zoland te’n galkap kaikhawm dingin Dimpi khua-ah a lut uh ahi hi.
“Dimpi khua sungah PDF-Zoland te a lut pen Dota kha 26, nitak nai 7 kiim hi ding hi. Nasep kiman ta ahih manin khangnote khua khungah kikaikhawm-in internet zanga a om laitak uh ahi hi. Tua laitakin Skat mawtaw khat hong lut ciangin khangnote kikhenthang in tai ngeingai uh hi. Pa Zam Za Thang’ tapa Tg Kham Ngaih Pau pen PDF-Zoland te khua sung hong lut ciangin inn mai pan taikhiat ding lem nawn lo ahih manin tawlet panin lengkhia-a, a pheiphung ah liamna ngahin a si khawl thei nawn lo hi. A pumpi hong dupsan ciangin Dota kha 27, 2026 ni-in Tedim kumpi zato ah kipuak hi”, ci-in Dimpi khua mi khat in gen hi.
Liamna ngah Kham Ngaih Pau pen kum 26 pha in, zato pan dam lam manawh nailo ahih manin lungmuan om nai lo hi. Dota kha 26 ni nitak-in PDF-Zoland te in Dimpi khuami mimal 6 galkap dingin man uh-a, Pithaini Dota kha 24 in Laaitui khua lam pan a mat uh naupang thum tawh kigawm leh, PDF-Zoland te mat Dimpi khua mi 9 pha ta hi, ci-in khua mi khat mah in gen hi.
A beisa Pithaini, Dota kha 24 ni a kiman te pen Pa Gin Sing’ tapa a kihel naupang 3 ahi uh hi. Amau pen Tuiphum kikhopna ah pai dingin a sang kahna uh Aizawl khuapi pan a hong ciah laitak uh ahi hi. Laaitui khua tawn a sang kahna lam a zuatna laitak un a kiman ahi hi. Kum 13-14 gual hi-in kum zong cing nai lo ahih manin, a nu leh a pate in ‘kum cing nai lo ahih teh ko khut sungah hong kemsak lai un’, ci -in ngen uh hi. PDF-Zoland lam pan-in “A kum cing dong ko na kem nung”, ci-in dawng uh hi, ci-in naupang 3 kimatna tawh kisai khua sung mi khat in gen beh hi.
Zomi Federal Union (ZFU)/PDF-Zoland in Zogam sung ah khangcing khin khempeuh kum 3 sung galkap sem hamtang ding ci-in Dota kha 24, 2026 ni-in a pulak khiat khit zawh, Laaitui khua ah khangno 12 leh Muizawl khua ah mi 3 galkap ding-in man uh hi, ci-in khuasung mite kiang pan kiza hi.
Dota kha 25, 2026 nitak nai 2 pawl-in Tedim township Laaitui khua mi 600 val in, galkap dinga PDF-Zoland te mat a khua mi uh 12 te hong khahkik nading in lungphona nei uh hi.
Source: Chin World
