Tun kha 6, 2026 ❖ THE TEDIM POST
China Communist Party in Union Solidarity and Development Party (USDP) te’ kiteelna gualzawhna hangin pahtawina laikhak khak uh hi. Tua lai pen Myanmar gam China palai (Ambassador) Ms. Ma Jia tungtawnin kingah ahihlam USDP makaipi U Khin Yi in a social media pan in pulakna nei hi.
China gam Beijing khuapi ah Tun kha 4 ni-in a kinei ahi press conference ah China Foreign Ministry thugenpa Lin Jian in, “Myanmar gam a picingin a din’ theih nading leh gam vai-ah kipawlna tuamtuamte a kihel theih nadingin China in Myanmar gam-a political party-te huhin panpih ding hi,” ci-in gen hi.
Tua banah Yangon khuapi, National Theatre ah 2026,Tun kha 5 ni-in a kibawl China Kumthak muakna pawi ah U Khin Yi leh USDP party makai liante kihel uh hi. Hih pawi ah kum dangin Galkap Mangpi Min Aung Hlaing kihel hi a,tukum ciang ama’ taangin State Premier U Nyo Saw kihel hi.
Galkap Mangpi Min Aung Hlaing pen Yangon University in Doctorate (Ph.D) degree a piakna pawi ankuang umna ah kihel ahih manin China Kumthak pawi ah a kihel manlo ahi hi.
Source: Internet/BBC
