Myanmar gam in tukum 2025 sungin beng ton tulkhat thoh in leitungbup ah illegal tawh beng tam a thoh pen gam hi cih United Nations Office on Drugs and Crime (UNODC) in December 3, 2025 in pulak khia hi.
UNODC laisuahsakna ah Myanmar gam in tukum sungin beng ton 1,010 thoh in, nidang a beng tam thoh pen Afghanistan gam hi a, 2025 sungin Myanmar gam in tua sangin a zah nih a tamzaw in a thoh ahi hi.
Myanmar gam sung ading in zong 2025 pen a beisa kum 10 sungin a tam pen hipah hi ci-in zong UNODC te’n gen hi. Beng ciinna leitang zong a beisa kum sangin 17% ah khangto a 2025 sung in leitang zaina 53,100 hectar ciang bang tungto ci hi.
Hih pen gam buaina hangin lametna bei-in sumzon sumzek lemlohnate a lak thukhat hipah hi cih zong pulakbeh uh hi. UNODC in Myanmar gam pen a beisa kum pan beng ciin kilim pat kik in, mai lam ah tam semsem zaw thei lai ding hi cih zong gen uh hi.
Myanmar gamah beng kilimciinna mun pen Shan State hi a, Myanmar gam sung ading 80% bang ahi hi. Shan gam nisuahnalam leh leitawlam mun tengah limcing deuh uh hi.
Chin State ah zong 2025 kum sungin bengciinna 26% bang ah khangto in 1,040 hectar bang tungto hi.
2025 sungin Kayah State ah 628 hectar, Kachin State ah 4,250 hectar leh Sagaing Division ah 552 hectar kiciing hi ci-in UNODC in pulak khia hi.
Source: BBC Burmese
……………………………………
